Golden State yagiye gutsindira Cleveland iwayo, itera intambwe igana ku gikombe

Ikipe ya Golden State Warriors yateye intambwe igana ku gikombe cya NBA y’uyu mwaka, nyuma yo kujya gutsindira Cleveland Cavaliers ku kibuga cyayo Quicken Loans Arena amanota 110-102 inakomeza kuyobora ku nsinzi 3-0, mu gihe hasigaye umukino umwe wo gukinwa.

Ikipe ya Cleveland yari iri gukinira imbere y’abafana bayo ni yo yatwaye agace ka mbere k’uyu mukino, ku manota 29 kuri 28 ya Warriors.

Iyi kipe yari iyobowe na kizigenza LeBron James yongeye gusubira mu byo yari yakoze mu gace ka mbere, itwara n’aka kabiri ku manota 29 kuri 24 ya Golden State.

Ikipe ya Golden State yabonye ko ishobora kugwiririrwa n’ibyayibayeho muri 2016 itwarwa igikombe na Cleveland kandi yari yarayitsinze mu mikino ibiri ibanza, bituma abasore bayo barimo Kevin Durant na Stephen Curry bakanguka.

Iyi kipe y’umutoza Steve Kerr yahise itwara agace ka gatatu, ku manota 31 kuri 23 ya The Cavs, inakomerezaho mu gace ka nyuma yatwaye ku manota 27 kuri 21.

Muri uyu mukino, Kevin Durant ni we watsinzemo amanota menshi 43, atanga imipira 7 yavuyemo amanota anakora rebounds 13.

Ku ruhande rwa Cleveland, King James yatsinze amanota 33, atanga imipira 11 yavuyemo amanota anakora rebounds 10, binamugira umukinnyi ukoze Tripple double ya 10 ku mukino wa nyuma wa NBA.

LeBron James kandi yakuyeho agahigo ka Kareem Abdul-Jabbar ko kuba umukinnyi wa kabiri waatsinze amanota menshi ku mukino wa nyuma, mu gihe mu mwaka ushize na bwo yari yakuyeho aka Lew Alcindor, ko gutsinda amanota menshi hagati muri Season.

Mu gihe Golden State yaba itsinze umukino umwe usigaye, yahita yegukana igikombe cya shampiyona cyaba kibaye icya kabiri cyikurikiranya, nyuma y’uko umwaka ushize na bwo yari yagitwaye itsinze Cleveland Cavaliers ku mukino wa nyuma.