Gicumbi: Kugaragaza umunaniro biri mu byaranze urugendo rw’abahanzi bari muri PGGSS bagiye gusuzuma ibyuma
Mu gihe kuri uyu wa gatandatu tariki ya 26 Gicurasi 2018 ariho irushanwa ya Primus Guma Guma Super Star riratangira, abahanzi bose uko ari icumi baririmo kuri uyu wa Gatanu bagiye I Gicumbi aharabera igitaramo cya mbere mu rwego rwo gusuzuma ibyuma.
Uretse umuhanzi Mico The Best wagiye mu nzira atera urwenya bangenzi be, abahanzi batandukanye bagaragaje intege nke dore ko bamwe banaguye agacuho bagasinzira ubwo bari mu nzira berekeza I Gicumbi.
Umuhanzi akaba n’umunyamakuru Uncle Austine unarwaye yagaragaje intege nkeya ndetse na Queen Cha yananiwe maze arasinzira.
Abahanzi icumi bari muri Primus Guma Guma Super Star igiye kuba ku nshuro yayo ya 8 ni Mico The Best, Uncle Austin, Jay C, Khalfan, Young Grace, Queen Cha, Bruce Melody, Just Family ndetse n’itsinda rya Active .
Irushanwa rya Primus Guma Guma Super Star riyoborwa na East African Promoters rikaba riterwa inkunga na Bralirwa. Kuva ryatangira mu 2011 , kwikubitiro ryatwawe na Tom Close, hakurikiraho King James, Riderman, Jay Polly, Butera Knowless ,Urban Boyzs na Dream Boys iheruka kuyitwara.
Kuri iyi nshuro habayemo impinduka mu bihembo kuko ubusanzwe bahembaga miliyoni 24 uwatwaye igikombe , ubu, umuhanzi uzegukana iki gikombe azaba ari uwatowe n’abagize akanama nkemurampaka uyu akazahembwa miliyoni makumyabiri (20,000,000 Frw) mu gihe uzatorwa n’abafana ku bwinshi we azahembwa amafaranga y’u Rwanda miliyoni cumi n’eshanu (15,000,000Frw).
Gutorwa n’abafana hazajya habarurwa amajwi yabonetse mu batoye bakoresheje imifuniko y’amacupa ya Primus, aha bazajya banwa ka manyinya hanyuma barebe mu mufuniko kode basanzemo abe ariyo bakoresha batora.
Nyuma yo gutaramira i Gicumbi, ibi bitaramo bizakomereza mu karere ka Musanze aho bazava berekeza i Huye ndetse nyuma yaho bazahite berekeza mu karere ka Rubavu bakazahava berekeza i Kigali ahazasorezwa iri rushanwa mu gitaramo cya nyuma.
