FC Barcelona yari yaje gukinira muri Afurika itsinze Mamelodi Sundowns-AMAFOTO
Ikipe ya Barcelona yari yaje gukinira muri Afurika y’Epfo itsindiyeyo Mamelodi Sundowns yo muri iki gihugu ibitego 3-1 mu mukino Barcelona yakinnye itakoreye imyitozo ku kibuga bakiniyeho.
Iyi kipe yatwaye igikombe cya Shampiyona muri Esipanye itsinzwe umukino umwe gusa, yageze muri Afurika y’Epfo habura isaha imwe gusa ngo yinjire mu kibuga, ibi ariko ntibiyibujije gutsinda ibitego 3 ikipe ya Mamelodi Sundowns kuko igice cya mbere cy’umukino cyarangiye ari ibitego 2 bya Barcelona byatsinzwe na Dembele na Louis Suarez mu gihe Mamelodi Sundowns yo yari ifite ubusa.
Gusa ariko nta kurushwa gukomeye kwabayeho mu kibuga kuko amakipe yombi yageragezaga kwiharira umupira ku mpande zombi ariko Barcelona ikaba ariyo iza ku isonga. umukino wakomeje maze uza kurangira ari ibitego 3-1. ibi bitego byatsinzwe na Ousmane Dembele ku munota wa gatatu, Luis Suarez ku munota wa 19 na Andre Gomez ku munota wa 66 ku ruhande rwa FC Barcelona mu gihe Sibusizo Vilakazi ari we watsindiye igitego kimwe rukumbi Mamelodi Sundowns.
Barcelone yakiniye ku kibuga Rayon Sports yakiniyeho ubwo yajyaga gukina na Mamelodi Sundowns, gusa iyi kipe y’ikatalonya yari yabanje mu kibuga abakinnyi babasimbura mu gihe Messi , Coutinho n’abandi basanzwe babanza mu kibuga bari babanje ku ntebe y’abasimbura.
