FC Barcelona yaraye yegukanye igikombe cya shampiyona, Messi aca agahigo gashya
Ikipe ya FC Barcelona yaraye yegukanye igikombe cya shampiyona ya Espagne ku ncuro ya 25, Lionel Messi aca agahigo ko kuba umukinnyi wa mbere muri shampiyona ya Espagne ushoboye gutsinda hejuru y’ibitego 30 byibura mu myaka irindwi itandukanye.
Ibi iyi kipe y’i Catalunya yabigezeho nyuma yo kujya gutsindira Deportivo La Curona iwayo ibitego 4 kuri 2 byanatumye iyi kipe yegukana iki gikombe nta mukino n’umwe itsinzwe mu gihe habura imikino ine yose ngo iyi shampiyona irangire.
Fc Barcelona yatangiye umukino wo ku mugoroba isatira cyane, iza no kubona igitego cya mbere ku munota wa 7 w’umukino ibifashijwemo na Philippe Coutinho, ku mupira yari ahawe na Ousmane Dembele.
Iyi kipe y’i Catalunya yatsinze igitego cya kabiri ku munota wa 38 ibifashijwemo na Lionel Messi wari uhawe umupira na Luis Suarez, gusa ku munota wa 40 Lucas Perez yahise yishyura kimwe mu bitego 2 Barca yari imaze gutsinda.
Amakipe yombi yagiye kuruhuka Barca iri imbere n’ibitego 2-1.
Igice cya kabiri cyatangiye Deportivo La Coruna y’umutoza Clarence Ceedorf yataka cyane, ibifashijwemo na Borja Valle watakaga anyuze ku ruhande rw’iburyo.
Byaje no kuyihira ku munota wa 64 w’umukino kuko Emre Çolak ukomoka muri Turkiya yaje gutsinda igitego cya 2, biba bibaye 2-2.
Ibi bitego byakurikiwe n’impinduka ku mutoza Ernesto Valvelde wakuye mu kibuga Ousmane Dembele akinjiza Denis Suarez, Paulinho asimbura Coutinho, mu gihe ku munota wa 87 Iniesta yasimbuye Ivan Raktic.
Izi mpinduka zongereye cyane imbaraga ikipe ya Barca, kuko ku munota wa 82 Messi yatsinze igitego ku mupira yari ahawe na Luis Suarez, abisubiramo ku munota wa 85 atsinda igitego cye cya gatatu muri uyu mukino cyanahesheje ikipe ye igikombe cya 7 mu myaka 10 ishize.
FC Barcelona isigaje imikino ine ya shampiyona harimo uwo izakiramo mukeba wayo w’ibihe byose Real Madrid ku cyumweru, uwo izakiramo Villa Real ku wa gatatu w’icyumweru gitaha, uwo izajya gusuramo Levante ndetse n’uwo izakramo Real Sociedad.
