FC Barcelona yamaze kwirukana uwari umutoza wayo
Ikipe ya FC Barcelona yo mu gihugu cya Espagne, yamaze kwirukana Victor Valdes wigeze kuyikinira, akaba yari umutoza w’ikipe y’abatarengeje imyaka 19 y’amavuko yayo.
Uyu mugabo wabaye umuzamu ukomeye w’iyi kipe y’i Catalunya, yirukanwe nyuma y’amezi atatu yonyine yari amaze ahawe na yo akazi.
Amakuru avuga ko Valdes w’imyaka 37 y’amavuko yirukanwe azira kutumvikana na Patrick Kluivert uyobora ishuri ry’umupira w’amaguru rya FC Barcelona, La Masia. Kluivert na we yakiniye FC Barcelona igihe kirekire.
FC Barcelona yemeje amakuru y’uko yirukanye Valdes mu itangazo yasohoye kuri uyu wa mbere.
Iri tangazo riragira riti” Kuri uyu wa mbere FC Barcelona yamenyesheje Victor Valdes ko atari umutoza w’ikipe yayo y’abatarengeje imyaka 19 kandi nta kiri umukozi w’ikipe. Franc Artiga wari umutoza w’ikipe y’akabiri y’abatarengeje imyaka 19 ndetse n’ikipe y’abakiri bato kuva muri 2010 ni we uri bumusimbure nk’umutoza w’abatarengeje imyaka 19.”
Biravugwa ko Valdes na Kluivert bakinanye muri Barcelona hagati ya 2002 na 2004 bapfaga ibintu byinshi, gusa ikirenze ibindi ngo ni uko Valdes yari yaranze kubahiriza uburyo bw’imikinire bwa 4-4-2 Kluivert yifuzaga.
Ikindi Valdes yapfuye na Kluivert cyo kimwe na FC Barcelona muri rusange, ngo ni uko ikipe yatozaga yimwe Stade yitiriwe Johann Kruyff ahubwo igahabwa ikipe ya kabiri y’abatarengeje imyaka 19 ndetse n’iy’abari n’abategarugori ngo abe ari zo ziyikiniraho.
Valdes wanakiniye ikipe ya Manchester United ariko ntagiriremo ibihe byiza, yari mu bahabwaga amahirwe yo gutoza FC Barcelona nkuru mu gihe umutoza Ernesto Varvelde yaba yirukanwe, none birangiye ibyo yakoreye iyi kipe byose bibaye ubusa.
