DRC: Leta yashyikirije u Rwanda ingabo 71 zirwanya ubutegetsi bwa rwo zafashe

FARDC igisirikare cya Leta iharanira Demokarasi ya Congo cyatangaje ko ku wa gatandatu w’icyumweru gishize cyatahukanye inyeshyamba z’u Rwanda 71 ziheruka gufatwa mu rugamba rukomeje kugabwa rugamije guhosha imitwe y’inyeshyamba zikambitse muri icyo gihugu.

Kapiteni Dieudonné Kasereka umuvugizi w’ingabo za Congo ziri muri urwo rugamba,yatangaje ko abo barwanyi ari abo mu mutwe wa Conseil national pour la renaissance et la démocratie (CNRD).

CNRD ni umutwe w’abarwanyi wiyomoye kuri Forces démocratiques pour la libération du Rwanda (FDLR) ikorera mu burasirazuba bwa Republika iharanira Demokarasi ya Congo.

Urugamba rwo kurwanya imitwe yitwaje intwaro mu karere ka Kalehe rwatangiye ku wa 26 z’ukwezi kwa 11 mu karere ka Kalehe.

Mu kiganiro yyagiranye na BBC, Kapiteni Kasereka avuga ko abo barwanyi bashikirijwe igisirikare cy’u Rwanda bari kumwe n’abandi 1471 bagizwe n’imiryango yabo.

Amenyesha ko izo nyeshyamba n’imiryango yabo bakiriwe na koloneli Patrick Musho ku ruhande rw’u Rwanda.

Avuga ko intambara zigikomeje kugaba ibitero mu karere ka Mwenga, aho abo barwanyi ba CNRD bari bageze barimo berekeza mu karere ka Fizi.

Amenyesha ko mu ntambara z’ejo ku Cyumweru mu gace ka Kasika zahuje abasirikare ba Congo n’izo nyeshyamba avuga ko zibarirwa mu ijana zanze gushyira intwaro hasi, bashoboye kwica umunyamabanga mukuru wa CNRD, bongera bafata mpiri n’abarwanyi basgera kw’icumi.

Ku wa 16 z’uku kwezi, umutwe wa mbere ugizwe n’inyeshamba 291 hamwe n’abana 11 baratahukanywe nyuma y’aho batsindiwe n’igisirikare cya Congo mu ntara ya Kivu y’Amajyepfo.

Kapiteni Kasereka avuga ko uwo mutwe w’abo batahukanywe ku wa gatandatu “ugizwe n’abaheruka gufatwa no mu minsi yashize, baka bari bacumbikiwe mu nkambi ya gisirikare ya Nyamunyunyi”, iri ku birometero 30 uvuye i Bukavu, umurwa mukuru wa Kivu y’Amajyepfo.

Ku wa 08 z’uku kwezi uyu mwaka, igisirikare cya Congo cyari cyatangaje ko abantu 1200 bo mu mutwe wa CNRD “bagizwe n’abarwanyi hamwe n’imiryango yabo” muri iyo ntara bafashwe mpiri.

Mu burasirazuba bwa Congo, habarirwa imitwe y’inyeshyamba igera kuri 133, imwe igizwe n’abanyecongo indi igizwe n’abanyamahanga, muri iyo 35 irwanira muri Kivu y’Amajyepfo, nk’uko bivugwa na Kapiteni Kasereka.

Avuga ko igisirikare cya Congo kirajwe ishinga no guhagarika ibitero ku bigabwa n’inyeshyamba zirwanira muri ako gace kugeza zishyize intwari hasi.