Cristiano Ronaldo akomeje kugwiza imikino ishoreranye n’ibitego

Rutahizamu Cristiano Ronaldo yakinnye umukino wa 1200 nk’uwabigize umwuga, atsindamo igitego ndetse atanga umupira wavuyemo ikindi kuri mugenzi we ubwo Al-Nassr yatsindaga Al-Riyadh ibitego 4-1 ku wa Gatanu.

Ronaldo w’imyaka 38, yatsinze ku mupira wahinduwe na Sadio Mané na we atanga uwavuyemo igitego cyatsinzwe na Otavio muri Shampiyona ya Arabia Saoudite aho Al-Nassr ari iya kabiri irushwa amanota arindwi na Al-Hilal ya mbere.

Kuri ubu, uyu Munya-Portugal ni we uyoboye ba rutahizamu muri Saudi Pro League aho amaze kwinjiza ibitego 16 mu mikino 15 y’uyu mwaka w’imikino.

Nyuma yo gukina uyu mukino wa 1200, Ronaldo yashimiye bose bamufashije kubigeraho, ariko yongeraho ko “bitararangira.”

Uwahoze ari Umunyezamu w’u Bwongereza, Peter Shilton, ni we bizwi ko yakinnye imikino myinshi nk’uwabigize umwuga mu bagabo aho yagaragaye mu mikino 1,387.

Ubwo Ronaldo yuzuzaga imikino 1000 muri Gashyantare 2020, na bwo yatsinze igitego muri Serie A aho yakiniraga Juventus.

Muri Kamena, yabaye umukinnyi wa mbere w’umugabo wujuje imikino 200 mu ikipe y’igihugu ubwo yakiniraga Portugal mu mukino wayihuje na Iceland. Ni we kandi uyoboye abatsindiye ibihugu byabo ibitego byinshi aho amaze kwinjiza 128.

Mu duhigo afite akinira amakipe, Ronaldo ni we wakinnye imikino myinshi ya Champions League (183), irimo iyo yakinnye muri Manchester United, Real Madrid na Juventus.

Yabaye kandi umukinnyi wa mbere watsinze ibitego 800 akina muri shampiyona zikomeye ubwo yabigezaga akinira Manchester United mu Ukuboza 2021, ubu akaba amaze kurenza 850.

Imikino 1200 Ronaldo amaze gukina irimo 31 yo muri Sporting, 346 muri Manchester United, 438 muri Real Madrid, 134 muri Juventus, 46 muri Al-Nassr na 205 mu Ikipe y’Igihugu ya Portugal.