Chelsea yatsinze Crystal Palace yisanga ku mukino wa nyuma w’ishyiraniro wa FA Cup
Kuri iki Cyumweru, ikipe ya Chelsea yageze ku mukino wa nyuma w’Igikombe cy’Igihugu (FA Cup) 2022 nyuma yo gutsinda Crystal Palace ibitego 2-0 mu mukino wa ½ cy’irangiza.
Nyuma yo gutsinda, Chelsea FC yakatishije itike iyemerera kugera ku mukino wa nyuma aho izacakirana na Liverpool FC.
Chelsea FC yageze ku mukino wa nyuma binyuze mu bitego yatsindiwe na Ruben Ira Loftus-Cheek ku munota wa 65 nyuma yo kwinjira mu kibuga asimbuye.
Intsinzi y’iyi kipe yo mu Mujyi wa London yashimangiwe n’igitego cya Mason Mount cyabonetse ku munota wa 76.
Umutoza wa Chelsea, Thomas Tuchel yakinishije abakinnyi be bakomeye barimo Edouard Mendy mu izamu; Reece James, Andreas Bødtker Christensen na Antonio Rüdiger mu bwugarizi.
Mu kibuga hagati hari Jorge Luiz Frello Filho Cavaliere”Jorginho”, Mateo Kovačić , Marcos Alonso Mendoza, César Azpilicueta Tanco, imbere yabo gato hari Mason Tony Mount.
Kai Lukas Havertz na Timo Werner bari imbere bashaka ibitego ariko banagaruka inyuma gushaka imipira.
Iyi kipe ni yo yacogoje imbaraga z’abakinnyi ba Crystal Palace birangira ibatsinze ibitego 2-0.
Abari muri Stade y’Igihugu cy’u Bwongereza (Wembley Stadium) baryohewe n’umukino wari wiganjemo imibare myiza kuri Chelsea FC kuko yawusoje yihariye umupira 65%.
Abakinnyi ba Chelsea FC bashatse ibitego batera amashoti 12 arimo ane agana mu izamu mu gihe Crystal Palace yateye atandatu arimo abiri agana mu izamu.
Crystal Palace itozwa na Patrick Vieira wakiniye Arsenal FC yaviriyemo muri ½ cy’irangiza n’ubwo abakinnyi be bagerageje gushaka ibitego ariko ntibahirwe.
Iyi kipe yateye koruneri ebyiri kuri eshanu za Chelsea FC iheruka ku mukino wa nyuma yatsindiweno na Leicester City igitego 1-0 mu 2021.
Chelsea FC izahura na Liverpool FC yageze ku mukino wa nyuma itsinze Manchester City ibitego 3-2 mu mukino wabaye ku wa Gatandatu, tariki ya 16 Mata 2022.
Biteganyijwe ko umukino wa nyuma uzahuza aya makipe ari mu ahagaze mu Bwongereza uzakinirwa i Wembley tariki 14 Gicurasi 2022.
