Cesc Fabregas wakiniraga ikipe ya Chelsea ntakiri umukinnyi wayo

Cesc Fabregas, Umunya-Espagne wakiniraga ikipe ya Chelsea yo mu Bwongereza yamaze gutandukana na yo yerekeza muri AS Monaco yo mu Bufaransa.

Fabregas wari umaze imyaka ine n’igice akinira Chelsea nyuma yo kuyigeramo avuye muri FC Barcelona, yasinyanye na AS Monaco amasezerano azarangira muri 2022.

Ikipe ya Monaco yemeje isinya rye ibinyujije kuri Twitter yayo.

Fabregas wanabaye Kapiteni wa Arsenal igihe kirekire, yaherukaga gukinira Chelsea muri FA Cup itsinda Nottingham Forest ibitego 2-0. Uyu ni wo mukino wa nyuma yari akiniye iyi kipe y’i Londres ari na wo yasezeyemo abafana bayo. Ni nyuma yo kuyikinira imikino 197 akayitsindira ibitego 22.

Uyu musore kandi yatwaranye na Chelsea ibikombe bine.

Uretse kuba uyu musore yasinye amasezerano y’imyaka itatu n’igice, yanakoze ikizamini cy’ubuzima.

Asanze muri Monaco Umufaransa Thiery Henry bakinanye muri Arsenal ndetse akanamusimburamo nka Kapiteni nyuma gato y’uko uyu mutoza wa Monaco yari amaze kwerekeza muri FC Barcelona.

Agiye muri AS Monaco kandi yiyongera kuri myugariro Naldo wasinyiye iyi kipe ku wa 3 Mutarama 2019. Naldo uyu ni myugariro w’imyaka 36 ukomoka muri Brazil. Yasinyiye AS Monaco amasezerano y’amezi 18 avuye muri Schalke 04 yo mu Budage.

Nta gihindutse, Fabregas ashobora gukinira AS Monaco umukino wa mbere ihura na Olympique de Marseille kuri iki cyumweru.