CECAFA Kagame Cup 2019: APR FC isezerewe na AS Maniema

AS Maniema yo muri Repubulika iharanira demokarasi ya Congo isezereye APR FC muri 1/4 cya CECAFA Kagame Cup kuri penariti 4-3.

Umukino watangiye AS Maniema yataka izamu rya APR FC ariko ba myugariro bari bayobowe na Manzi Thierry bakahagoboka.

APR FC yakiniraga imbere y’abafana bayo yagerageje guhuza Umukino ishaka igitego ariko Sugira Ernest ntabashe gutsinda. Ku munota wa 15 APR FC yabonye uburyo bw’igitego, Niyonzima Olivier Sefu yamanukanye umupira ariko awuhinduye mu rubuga rw’amahina Byiringiro Lague ananirwa kuwushyira mu rushundura.

Ku munota wa 40 Sugira Ernest yasize ba myugariro ba AS Maniema asigarana n’umunyezamu Matumele Monzobo Arnold ariko ntiyabasha gutsinda umunyezamu arawufata igice cya mbere kirangira ari 0-0.

Igice cya kabiri cyatangiye APR FC ikora impinduka havamo Sugira Ernest wari ku rwego rwo hasi kuri uyu mukino hajyamo Mugunga Yves.

Ku munota wa 55 w’umukino APR FC yabonye umupira w’umuterekano ku ikosa ryari rikorewe Byiringiro Lague ariko umunyezamu wa AS Maniema arahagoboka, umunyezamu yahise atera umupira imbere bageze imbere y’izamu rya Rwabugiri Omar umusifuzi avuga ko habayeho amakosa umupira uterekwa imbere y’izamu.

Amakipe yombi yakomeje gukina ashaka uburyo babona ibitego ariko biranga umukino urangira banganya 0-0.

Nkuko amategeko yiri rushanwa abiteganya, bahise batera penariti. Manzi Thierry niwe wabanje gutera iya mbere arayihusha , Butera Andrew arayinjiza, Ombolenga Fitina arayinjiza , Kevin arayinjiza, Byiringiro Lague arayihusha mu gihe AS Maniema yahushije imwe.

Gusezererwa kwa APR FC bisize nta kipe nimwe  yo mu Rwanda isigaye muri CECAFA Kagame Cup 2019 nyuma y’uko kuri uyu wa Kabiri Rayon Sports isezerewe na KCCA ku bitego 2-1.

Ikipe izatwara igikombe cya CECAFA Kagame Cup ya 2019 izatwara ibihumbi 30 by’amadorali , iya kabiri ihabwe ibihumbi 20 by’amadorali naho izaba iya gatatu ihabwe ibihumbi 10 by’amadorali .