CAF Champions league: Mamelodi Sundowns yatsindiwe muri Maroc na Wydad Casablanca
Ikipe ya Mamelodi Sundowns yo muri Afurika y’Epfo yaraye itakaje umukino ubanza wa ½ cy’irangiza cya Total CAF Champions league, nyuma yo gutsindwa na Wydad Casablanca yo muri Maroc ibitego 2-1.
Hari mu mukino ubanza wabereye i Rabat mu murwa mukuru wa Maroc.
Salaheddine Saidi ni we wafunguye amazamu ku ruhande rw’ikipe ya Wydad Casablanca, ku gitego yatsinze ku munota wa 26 w’umukino. Ni nyuma ya za Contre-Attaques nyinshi iyi kipe yo muri Maroc yari yazongesheje ikipe ya Masandawana.
Ikipe ya Mamelodi itari yigeze icika intege, yishyuye mbere gato y’uko igice cya mbere (Ku munota wa 42) kirangira ibifashijwemo na myugariro Anele Ngcongca. Ni igitego uyu musore yatsinze ku mutwe.
Abanya-Maroc bongeye kuyobora umukino mu ntangiriro z’igice cya kabiri cy’umukino, batsnda igitego cya kabiri babifashijwemo kabuhariwe Badie Aouk. Ni nyuma y’uko ba myugariro ba Mamelodi Sundowns barangaranye uyu musore ukina hagati mu kibuga bikarangira abatsindanye igitego.
Muri rusange ikipe ya Wydad Casablanca yagiye ibona uburyo bwinshi bw’ibitego, gusa igasanga Umugande Denis Onyango urinda izamu rya Mamelodi Sundowns ahagaze neza.
Mamelodi Sundowns irasabwa gutsinda igitego 1-0 mu mukino wo kwishyura, kugira ngo ikatishe itike y’umukino wa nyuma wa CAF Champions league uyu mwaka.
Ni umukino uzabera kuri Stade Lucas Moripe iherereye i Pretoria muri Afurika y’Epfo, mu cyumweru gitaha.
