Byiza! Kera kabaye Cazorla yongeye guhamagarwa mu kipe y’igihugu ya Espagne
Santiago Gonzalez Cazorla wahoze akinira Arsenal yo mu Bwongereza, yongeye guhamagarwa n’ikipe y’igihugu cye cya Espagne nyuma y’iminsi 1282 (imyaka ine) atayikandagiramo.
Ni nyuma yo kumara 668 hanze y’ikibuga kubera imvune ikomeye yagiriye mu kipe ya Arsenal. Ni imvune yateye benshi ubwoba ku buryo bari baranagize impungenge z’uko uyu mugabo ashobora gucibwa akagaguru, dore ko n’abaganga bari baramubwiye ko atazapfa gukira. Iyi mvune yakize Cazorla amaze kubagwa incuro 11 zose.
Nyuma yo kuva muri Arsenal akerekeza muri Villarreal y’iwabo muri Espagne, Santi Cazorla yahamagawe n’umutoza Luis Enrique mu bakinnyi Espagne igomba kwiyambaza ikina n’ibirwa bya Faroe ku wa 07 Kamena, ndetse n’umukino izahuriramo na Sweden ku wa 10 Kamena.
Hazaba ari mu majonjora yo gushaka itike y’igikombe cy’u Burayi kizaba mu mwaka utaha.
Santi Cazorla w’imyaka 34 y’amavuko, yaherukaga kugaragara muri La Furia Roja muri 2015. Mu mikino 77 yakiniye iyi kipe, yashoboye kuyitsindiramo ibitego 14. Umukino wa hafi yaherukaga gukiniramo Espagne ni uwabaye muri Nzeri 2015, ubwo Espagne yatsindaga ikipe y’igihugu y’u Bwongereza ibitego 2-0 mu mukino wa gicuti.
Muri uyu mukino Cazorla ni we watsindiye Espagne igitego cya kabiri.
Villarreal kuri ubu akinira, yayifashije kwizera kuguma muri La liga, nyuma yo kuyitsindira ibitego bine akanatanga imipira 1o yavuyemo ibitego.
Urutonde rw’abakinnyi bahamagawe n’umutoza Luis Enrique.
Abazamu: David de Gea (Manchester United), Kepa Arrizabalaga (Chelsea), Pau Lopez (Real Betis).
Ba myugariro: Dani Carvajal (Real Madrid), Sergio Ramos (Real Madrid), Mario Hermoso (Espanyol), Diego Llorente (Real Sociedad), Inigo Martinez (Athletic Bilbao), Jordi Alba (Barcelona), Sergi Roberto (Barcelona), Jose Gaya (Valencia), Jesus Navas (Sevilla).
Abakina hagati mu kibuga: Sergio Busquets (Barcelona), Rodrigo Hernandez (Atletico Madrid), Dani Parejo (Valencia), Isco (Real Madrid), Fabian Ruiz (Napoli), Santi Cazorla (Villarreal).
Ba rutahizamu: Mikel Oyarzabal (Real Sociedad), Rodrigo Moreno (Valencia), Marco Asensio (Real Madrid), Iago Aspas (Celta), Alvaro Morata (Atletico Madrid).
