Bimenyimana Caleb yasezeye abafana ba Rayon Sports
Rutahizamu Bimenyimana Bonfils Caleb ukinira Rayon Sports, yasezeye abafana nyuma yo gufasha ikipe ye gutsinda Etincelles FC mu mukino w’irushanwa ry’intwari.
Caleb yashoboye gutsinda igitego kimwe muri 2-0 Rayon Sports yatsinze Etincelles.
Iki gitego cyinjiye ari icya kabiri, yagitsinze ku munota wa 66 w’umukino, nyuma y’icyo Michael Sarpong yari yatsinze ku munota wa 14 w’umukino.
Ibi bitego by’aba basore bombi byari bihagije kugira ngo iyi kipe iyobore urutonde rw’amakipe ane ahatanye mu irushanwa ry’intwari.
Nyuma y’umukino, Caleb yagaragaye apepera abafana ba Rayon Sports mu rwego rwo kubasezera ari na ko abashimira. Uyu musore ukomoka i Burundi yanagaragaye aha imyambaro bamwe mu bafana ba Rayon Sports.
Caleb wifujwe kenshi n’amakipe atandukanye ya hano muri Afurika no ku mugabane w’u Burayi, ari gukinira Rayon Sports imikino ye ya nyuma mbere yo kwerekeza muri Bosnia & Herzegovina ho mu majyepfo y’Uburayi.
