APR FC ishobora guhura n’imbogamizi zo kujya i Kinshasa gukina na Les Aigles du Congo

Nyuma y’uko APR FC ihagarariye u Rwanda muri CAF Champions League itomboye Les Aigles du Congo yo muri Repubulika Iharanira Demokarasi ya Congo (RDC), haribazwa niba umukino ubanza uzabera i Kinshasa nk’uko byateganyijwe.

Tombola y’aya marushanwa yabereye i Cairo mu Misiri ku wa 6 Kanama 2026, aho APR FC yamenye ikipe izahangana na yo mu cyiciro cy’ibanze.

Umukino ubanza uteganyijwe hagati ya tariki ya 4 n’iya 6 Nzeri 2026, aho Les Aigles du Congo izaba yakiriye APR FC. Umukino wo kwishyura ukazabera i Kigali hagati ya tariki ya 11 n’iya 13 Nzeri.

Umubano utari mwiza hagati y’u Rwanda na RDC

Iyi gahunda y’imikino ibaye mu gihe umubano w’u Rwanda na RDC ukomeje kuba mubi, cyane cyane kubera amakimbirane ajyanye n’umutekano mu Burasirazuba bwa RDC.

Kinshasa ikunze gushinja Kigali gufasha umutwe wa M23, ibyo u Rwanda rukomeza guhakana. Ku ruhande rw’u Rwanda, rwo rushinja RDC gukorana na FDLR, umutwe ruvuga ko ugihungabanya umutekano w’igihugu.

Ibi bituma kuba APR FC, ikipe y’Ingabo z’u Rwanda, yakina umukino i Kinshasa bishobora kuzamura ibibazo by’umutekano n’imigendekere y’urugendo.

Mu ntangiriro za 2025, RDC yafunze Ambasade yayo i Kigali, mu gihe nyuma yaho yafunze n’ikirere cyayo ku ndege ziva mu Rwanda.

Hari kandi ibyabaye muri Mutarama 2025, ubwo imyigaragambyo yabereye i Kinshasa yibasiye ambasade z’ibihugu bitandukanye, harimo n’iy’u Rwanda.

Ikibazo cy’umutekano w’abafana

Usibye umwuka mubi wa politiki hagati y’ibihugu byombi, hari n’impungenge z’umutekano zishingiye ku myitwarire y’abafana mu mikino imwe n’imwe.

Muri Gicurasi 2026, umukino wahuje Les Aigles du Congo na AS Vita Club waranzwe n’imvururu. Ibyo byatumye amakipe yombi ahanwa muri Kamena, ategekwa gukina imikino imwe nta bafana.

Ibi bishobora gutuma CAF yongera gusuzuma uko umukino wa APR FC na Les Aigles du Congo wakinwa, cyane cyane mu gihe haba hari impungenge z’umutekano.

Ebola na yo ishobora kugira uruhare

Ikindi kibazo gishobora kugira ingaruka ku migendere y’aya makipe ni icyorezo cya Ebola cyagaragaye muri RDC.

Kuva hagati muri Gicurasi 2026, u Rwanda rwafashe ingamba zo gukumira ko Ebola yakwinjira mu gihugu. Mu ngamba zatangajwe na Minisiteri y’Ubuzima harimo izireba abantu baturuka cyangwa baheruka kuba muri RDC.

Abanyamahanga baba baragiye cyangwa banyuze muri RDC mu minsi 30 mbere yo kugera mu Rwanda bashyiriweho amabwiriza yihariye yo kwinjira, mu gihe ababa bafite uburenganzira bwo gutura mu Rwanda na bo bashobora gushyirwa mu kato bitewe n’igihe baherukirayo.

Iki kibazo cyagaragaye no ku bantu bafite aho bahurira n’umupira w’amaguru. Ku wa 7 Kanama 2026, umunyamakuru Micky Jr yatangaje ko Florent Ibenge, umutoza w’Umunye-Congo wa Azam FC, yari amaze icyumweru ataragera ku ikipe ye kubera ingamba z’u Rwanda zijyanye no kwirinda Ebola.

CAF ishobora kwimura umukino?

Nubwo APR FC na Les Aigles du Congo ziteganyijwe guhura i Kinshasa, ntabwo bivuze ko umukino ugomba gukinirwa aho uko byakabaye.

Amategeko ya CAF agenga amarushanwa y’amakipe ateganya ko umukino ushobora gukinirwa ahandi hatari ku kibuga gisanzwe cy’ikipe yakiriye, bitewe n’impamvu zirimo umutekano cyangwa izindi mpamvu zemewe.

Icyemezo nk’iki gishobora gufatwa binyuze mu bwumvikane bw’impuzamashyirahamwe z’umupira w’amaguru z’ibihugu birebwa cyangwa na Komisiyo y’Amarushanwa ya CAF.

Kugeza ubu, ikibazo gikomeye ni ukumenya niba APR FC izemererwa kujya i Kinshasa gukina umukino ubanza cyangwa niba hazafatwa indi gahunda bitewe n’umutekano n’izindi ngamba zireba ingendo hagati y’u Rwanda na RDC.

Icyemezo cya nyuma kizaba gifite uruhare rukomeye mu kumenya aho umukino ubanza wa APR FC na Les Aigles du Congo uzabera.