Amafoto ya Uwase n’abo bahataniye ikamba rya Miss Supranational bambaye amakariso
N’ubwo bitavugwaho rumwe hano mu Rwanda, Uwase Clementine bakunze uzwi ku kazina ka Tina wagiye guhagarariye u Rwanda mu irushanwa rya Miss Supranational uyu mwaka bitunguranye n’abo bahataniye iri kamba biyerekanye bambaye amakariso yo kogana azwi nka’Bikini’
Byabaye kuri iki Cyumweru tariki 25 Ugushyingo 2018, muri Hotel yitwa Golebiewski iri muri Pologne , Uwase Clemantine yiyerekanye mu cyiciro gikomeye cyo kwerekana imiterere y’umubiri mu mwambaro wa bikini.
Mu myaka icyenda iri rushanwa rimaze, ni ku nshuro ya munani u Rwanda rwitabiriye Miss Supranational.
Mu 2011 hagiyeyo Simbi Sabrina , mu 2012 hajyayo Uwamahoro Yvonne, mu 2013 hajyayo Miss Mutesi Aurore, mu 2014 hajyayo Umwali Neema Larissa, mu 2015 ni Gisa Sonia wagiyeyo, mu 2016 hajyayo Akiwacu Colombe mu 2017 Ingabire Habiba no mu 2018 hagiyeyo Uwase Clementine wagiye guhagararira u Rwanda bitunguranye.
Uwambaye ‘bikini’ muri iri rushanwa yagiye aba iciro ry’imigani hano mu Rwanda ashinjwa kwica umuco.
Muri iri rushanwa Gisa Sonia wagiyeyo mu 2015 niwe wabimburiye abandi atinyuka kwambara ‘Bikini’ ndetse anasoza irushanwa agizwe Miss Africa Supranational 2015.
Mu 2016 nabwo Akiwacu Colombe yarayambaye ndetse asoza abonetse mu bakobwa icumi ba mbere bitwaye neza.
Ingabire Habibah mu 2017 nawe yarayambaye ariko ntiyabasha kuza mu myanya myiza.
Umukobwa uzahiga abandi mu byiciro byose bitangwamo amanota azamenyekana ku itariki ya 7 Ukuboza 2017 ahitwa Krynica-Zdrój muri Pologne. Azasimbura Jenny Kim wo muri Korea y’Epfo wegukanye ikamba umwaka ushize.
Ku wa 22 Ugushyingo, nibwo Uwase usanzwe ari umunyamideli yahawe umwanya wo guhagararira u Rwanda muri Miss Supranational 2018, asimbuye Munyaneza Djazira uherutse kwamburwa uyu mwanya kubera kwambara ikariso no kugaragaza imyanya y’ibanga ku karubanda abinyujije ku mbuga nkoranyambaga.
