Amafoto-Real Madrid idafite Christiano Ronaldo yabonye amanota 3 ya mbere muri shampiyona

Ikipe ya Real Madrid yaraye ibonye amanota 3 ya mbere muri shampiyona ya Espagne, nyuma yo gutsinda Getafe ibitego 2-0 mu mukino w’umunsi wa mbere wa shampiyona yakinnye bwa mbere idafite rutahizamu Christiano Ronaldo.

Ni umukino iyi kipe y’ibwami yari yakiriyemo Getafe ku kibuga cyayo cya Santiago Bernabeu.

Ibitego bya Gareth Bale na Daniel Carvajal ni byo byahesheje iyi kipe y’umutoza Julen Lopetegui kubona amanota gutera ikirenge mu cya mukeba wayo Barcelona na yo yamaze kwegukana amanota atatu itsinze Deportivo Alaves ibitego 3-0.

N’ubwo Real Madrid yabashije kubona uyu mukino, icyagaragaye ni uko icyuho cya Christiano Ronaldo cyatangiye kwigaragaza muri iyi kipe, haba mu kibuga imbere ndetse no hanze yacyo.

Urugero: Nko ku kijyanye n’ubwitabire bw’abafana, imikino 2 Real Madrid iheruka gukinira i Santiago Bernabeu kuva Christiano Ronaldo yajya muri Juventus, yagiye yitabirwa n’abafana bari munsi y’ibihumbi 50, ibintu byaherukaga mbere y’itariki ya 24 Gicurasi 2009 ubwo Ronaldo yageraga muri iyi kipe.