Perezida Macron yavuze ko ibihano bidakwiye kuba inzira ya mbere ku kibazo cy’u Rwanda na RDC
Perezida w’u Bufaransa, Emmanuel Macron, yavuze ko ibihugu byo ku Mugabane w’u Burayi bikwiye gushyira imbere ibiganiro bya dipolomasi aho kwihutira gufatira u Rwanda ibihano, ashimangira ko amahoro arambye atagerwaho binyuze mu gitutu gusa.
Ibi yabigarutseho mu kiganiro yagiranye na France 24 ubwo yari mu ruzinduko muri Kenya, nyuma y’uko Amerika ifatiye ibihano bamwe mu bayobozi b’ingabo z’u Rwanda ndetse n’abasirikare bakuru, ibashinja kugira uruhare mu bibazo by’umutekano muke mu burasirazuba bwa Democratic Republic of the Congo.
Leta y’u Rwanda yakomeje guhakana ibyo ishinjwa byo gufasha ihuriro rya AFC/M23, ivuga ko ikibazo cy’umutekano muke mu burasirazuba bwa RDC gifitanye isano n’umutwe wa FDLR, Kigali ifata nk’umutwe w’iterabwoba ushobora guhungabanya umutekano w’u Rwanda.
Ku ruhande rwa RDC, ubuyobozi bw’icyo gihugu bwakiriye neza icyemezo cya Amerika, busaba n’ibihugu byo mu European Union gufatira u Rwanda ibihano bisa n’ibyo Washington yafashe.
Perezida Macron yavuze ko u Bufaransa n’ibihugu by’u Burayi bishyigikiye uburyo bwo gukomeza ibiganiro hagati y’impande zose zifitanye ikibazo, aho gushyira imbere ibihano. Yagaragaje ko ikibazo cyo mu burasirazuba bwa RDC gikwiye gukemurwa hubahirijwe ubusugire bwa RDC ndetse n’umutekano w’ibihugu byose byo mu karere.
Yanavuze ko ikibazo cya FDLR kidakwiye kwirengagizwa, ashimangira ko Leta ya RDC ikwiye kugira uruhare mu kurwanya uwo mutwe, kimwe no kugarura ubuyobozi bwayo mu bice itakigenzura.
Perezida Macron yagaragaje kandi ko amahoro arambye azagerwaho ari uko ibihugu byo mu karere birimo Uganda n’Burundi byifatanyije mu biganiro no gushakira hamwe ibisubizo ikibazo cy’umutekano.
Ibi Macron yabivugiye nyuma yo kwitabira inama ya Africa Forward Summit yabereye i Nairobi, aho yari kumwe na Perezida Paul Kagame ndetse na Perezida Félix Tshisekedi.
Macron yavuze ko yagiranye ibiganiro bitandukanye na buri muyobozi, ariko ko kubahuza bose icyarimwe bikiri ingorabahizi. Yongeye gushimangira ko hakenewe ibiganiro bihoraho hagati ya Kigali na Kinshasa, bifashijwemo n’abahuza mpuzamahanga.
Uyu Mukuru w’Igihugu yavuze kandi ko ibihano bidakwiye gufatwa nk’umuti wihuse ku bibazo by’akarere, kuko bishobora gutuma ibiganiro bigorana kurushaho.
Yagaragaje ko gushyira u Rwanda ku ruhande bishobora kugabanya amahirwe yo kugera ku bufatanye no ku mahoro arambye.
Nubwo muri Kamena 2025 u Rwanda na RDC byasinyanye amasezerano agamije amahoro, ndetse nyuma hakongerwamo ay’ubufatanye mu iterambere ry’ubukungu, kugeza ubu haracyari impungenge ku ishyirwa mu bikorwa ryayo no ku mutekano wo mu burasirazuba bwa RDC.
