APR FC yakoreye imyitozo ya mbere mu karere ka Nyagatare(Amafoto)

Ikipe ya APR FC iherereye i Nyagatare mu Burasirazuba bw’igihugu, yaraye ihakoreye imyitozo ya mbere mu rwego rwo kwitegura shampiyona y’umwaka utaha izatangira mu ntangiriro z’Ukwakira.

Iyi kipe y’ingabo z’igihugu yageze i Nyagatare saa sita z’ejo ziburaho iminota mike, ihita yerekeza kuri Hotel City Blue aho yafatiye ifunguro rya saa sita, akaba ari na ho igomba kumara iminsi 3 icumbitse mbere yo kugaruka i Kigali kuri uyu wa gatandatu.

Saa Kumi z’umugoroba ni bwo APR FC yari itangiye imyitozo yakorewe kuri hotel, dore ko iyi hotel inafite ibikoresho byinshi bitandukanye byifashishwa mu myitozo. Iyi myitozo ya APR FC, yibanze ku kurambura no kugorora ingingo ari na ko bananura amaguru binyuze mu kwirukanka, nyuma y’iminota 30 abakinnyi bajya gukomereza imyitozo mu byuma byongera imbaraga.

Magingo aya abakinnyi ba APR FC bari mu myitozo yatangiye saa tatu, bikaba biteganyijwe ko baza kuyisubiramo saa kumi z’umugoroba nyuma yo kuruhuka no gufata ifunguro rya saa sita.