Umutoza Maurizio Sarri yasabye imbabazi abakunzi ba Chelsea

Umutoza Maurizio Sarri wa Chelsea yasabye imbabazi abakunzi b’ikipe atoza nyuma yo kunyagirwa na Manchester City.

Umutoza Maurizio Sarri w’ikipe ya Chelsea na kapiteni Cesar Azpilicueta w’iyi kipe, bombi basabye imbabazi nyuma yo kunyagirwa ibitego 6-0 na Manchester City mu mukino wa Premier League wabaye ku cyumweru.

Manchester City imaze gutsinda ibitego 14 mu mikino itanu yayihuje n’amakipe atozwa na Maurizio Sarri – Napoli mu mwaka w’imikio wa 2017 – 2018, Chelsea mu wa 2018 – 2019.

Mu minota 25 y’umukino, City yari yamaze gutsinda Chelsea ibitego 4-0, muri uyu mukino wabaye uwa gatatu wikurikiranya itsinzwe yasuye, ikaba imaze gutsindwa ibitego byose hamwe 12 idakoramo.

Sarri, Umutaliyani w’imyaka 60 y’amavuko, mugusaba imbabazi yagize ati: “Mu mikino itatu iherutse twakinnye twasuye, twakinnye nabi cyane, rero tubisabiye imbabazi”.

Sergio Aguero yujuje ibitego bitatu muri uwo mukino ubwo yinjizaga penaliti ku munota wa 56, mbere yuko Raheem Sterling yinjiza indi mu minota ya nyuma y’umukino.

Kuva Chelsea yanyagirwa na Nottingham Forest ibitego 7-0 mu kwezi kwa kane mu mwaka wa 1991 mu mukino wari wabereye ku kibuga cya Nottingham Forest, bwari bubaye ubwa mbere Chelsea yongeye kunyagirwa bene ako kageni.

Azpilicueta w’imyaka 29 y’amavuko, myugariro akaba na kapiteni w’iyi kipe, yongeyeho ati: “Iri ni rimwe mu majoro mabi cyane ngize mu gihe maze nkina. Biragoye gusobanura ibyabaye”.

“Turi gutsindwa ibitego byinshi kandi ibi ntidushobora kubyemera. Icyo nshobora gukora cyonyine ni ugusaba imbabazi abafana kuko ntibyemewe”.

Umutoza Sarri, wavuye mu ikipe ya Napoli yatozaga muri shampiyona ya Serie A y’icyiciro cya mbere mu Butaliyani ku mpeshyi ishize agiye gutoza Chelsea, yabajijwe niba afite impungenge kuri ejo he hazaza muri iyi kipe.

Yasubije ati: “Simbizi. Murikumbaza ku kintu kitari mu kazi kanjye. Mpangayicyishijwe n’imikinire yacu, ntabwo mpangayicyishijwe n’ikipe. Ibyo mwabibaza ubuyobozi bw’ikipe”.

“Ndashaka kwiga, ndashaka gusobanukirwa. Nkora uko nshoboye kose n’abakinnyi bakora uko bashoboye kose. Kuri ubu icyo ngomba kuvuga gusa ni ugusaba imbabazi”.

Chelsea ubu yamaze kunyerera igera ku mwanya wa gatandatu ku rutonde rw’agateganyo rwa shampiyona y’Ubwongereza, inyuma ya Arsenal, kubera ikinyuranyo cy’ibitego.