Nyuma yo gukorera imyitozo i Nyagatare, APR FC igiye kuyikomereza i Huye
Ikipe ya APR FC ikomeje kwitegura umwaka utaha w’imikino igiye gukomereza imyitozo i Huye mu majyepfo y’u Rwanda aho izamara icyumweru cyose.
Ni nyuma y’uko iyi kipe mu cyumweru gishize yari yagiye i Nyagatare aho yamaze iminsi itatu mbere yo kugaruka i Kigali ku wa gatandatu w’icyumweru gishize aho yavuye yerekeza i Muhanga gukina umukino wa gicuti na AS Muhanga.
Uyu mukino warangiye amakipe yombi anganyije 2-2.
Ku munsi w’ejo ku wa kabiri n’uyu munsi ku wa gatatu abakinnyi ba APR FC bakoreye imyitozo i Shyorongi aho iyi kipe isanzwe ikorera imyitozo, mbere yo guhaguruka i Kigali ejo ku wa kane yerekeza i Huye aho izamara iminsi 6.
Aha mukarere ka Huye, biteganyijwe y’uko APR FC izahahurira n’amakipe atandukanye mu rwego rwo kwipima na yo mu mikino ya gicuti.
