Diamond Platnumz yibutse ubufatanye na The Ben aririmba “Why” mu gitaramo cy’amateka i Manchester
Umuhanzi ukunzwe cyane muri Tanzania no ku rwego mpuzamahanga, Diamond Platnumz, yongeye kwerekana ko afitanye umubano udasanzwe n’umuhanzi nyarwanda The Ben, ubwo yataramaga n’abafana be mu gitaramo gikomeye cyabereye muri Manchester Academy, ku wa Gatandatu, tariki ya 14 Kamena 2025.
Ni kimwe mu bitaramo biri mu rugendo rwa Diamond mu Bwongereza, aho yari amaze gutaramira i Birmingham ndetse na Royal Albert Hall i London ku wa 13 Kamena. Igitaramo cyo i London cyari cyitabiriwe n’icyamamare Tiwa Savage, Flavour ndetse na Patoranking, n’imbaga y’abakunzi ba muzika bari baje kumushyigikira.
Muri Manchester, Diamond yanyuze abari aho abacurangira indirimbo ze zakunzwe cyane nka Zuwena, Jeje, Number One na Yatapita. Ariko igice cyatangaje benshi ni igihe yahisemo kuririmba indirimbo “Why” yakoranye na The Ben, ifite amateka akomeye muri muzika yo muri Afurika y’Iburasirazuba.
Uburyo abitabiriye igitaramo bifatanyije na Diamond baririmba iyi ndirimbo ijambo ku rindi, byagaragaje ko igihangano cyabo cyagize ingaruka zikomeye mu mitima y’abafana. Amashusho agaragaza iyo siyanse y’imyidagaduro yakwirakwijwe cyane ku mbuga nkoranyambaga nka YouTube na TikTok.
Nk’uko byemezwa n’urubuga rwa JamBase, Diamond arasoza uru rugendo rw’ibitaramo mu Bwongereza kuri SWG3 i Glasgow ku itariki ya 15 Kamena 2025. Nyuma yaho, azakomereza mu bindi bihugu by’i Burayi, mu rwego rwo gukomeza kwamamaza umuziki we no gutegura ubufatanye bushya n’abandi bahanzi mpuzamahanga.
Indirimbo “Why” yasize amateka nk’itangiriro ry’ubucuti hagati ya The Ben na Diamond, ndetse amakuru agera ku bitangazamakuru yemeza ko aba bahanzi bombi bari mu mushinga wo gushyira hanze indirimbo nshya izongera kubahuza, ikaba izaba ari intambwe ikomeye mu rugendo rwabo rwa muzika mpuzamahanga.
Diamond akomeje kwagura izina rye ku rwego rw’isi, abifashijwemo n’imyitwarire ye idasanzwe mu bitaramo, ubufatanye bwa kinyamwuga n’abandi bahanzi no gukomeza kwambutsa umuco wa Afurika mu muziki w’isi.
