Rutsiro FC yashyiriweho agahimbazamusyi kugira ipfunyikire Rayon Sports impamba y’ibitego
Ikipe ya Rutsiro FC yashyiriweho agahimbazamushyi gafatika kugira ngo izapfunyikire Rayon Sports impamba y’ibitego mu mukino wa Shampiyona uzahuza aya makipe yombi kuri uyu wa Gatatu tariki ya 3 Ugushyingo 2021.
Ubuyobozi bw’ikipe burangajwe na Nsanzimfura Jean Damascene bwemereye abakinnyi n’abatoza agahimbazamusyi k’ibihumbi 50 kuri buri umwe nibaramuka bashoboye gutsinda Rayon Sports.
Uyu mukino uzahuza aya makipe yombi uzabera mu Karere ka Rubavu kuri Stade Umuganda Saa Cyenda z’amanywa.
Ku munsi wa mbere wa shampiyona ikipe ya Rayon Sports yari yatsinze Mukura Victory Sports igitego 1-0, mu gihe ku Cyumweru tariki 31 Ukwakira Rutsiro FC yaguye miswi na Etincelles FC 0-0.
Ni ku nshuro ya kane aya makipe araba agiye guhura muri shampiyona, bwa mbere bahura hari tariki 8 Gicurasi 2021 Rayon Sports itsinda Rutsiro FC ibitego 2-0, bahuye ku mukino wa kabiri tariki 11 Gicurasi banganya igitego 1-1, tariki 22 Kamena 2021 bahuye bwa gatatu Rutsiro FC itsinda Rayon Sports ibitego 2-0.
