Rayon Sports yatangiye gukoresha igerageza umukinnyi yakuye kwa mukeba wayo APR FC(Amafoto)
Ikipe ya Rayon Sports yatangiye gukoresha umukinnyi usatira aciye ku ruhande, Sekamana Maxime ibizamini byo kumusuzuma kugira hakomeze kurebwa urwego ahagazeho, hanyuma nashimwa n’abatoza azongererwa amasezerano muri iyi kipe y’abafana.
Mu mpera z’umwaka w’imikino ushize wa 2020-2021, nibwo amasezerano ya Sekamana Maxime yagannye ku musozo, na nubu iyi kipe ikaba itarigeze ishyira imbaraga mu kumwongerera andi.
Byavuzwe ko ashobora kwerekeza mu makipe atandukanye yo mu Rwanda arimo Mukura Victory Sports, Kiyovu Sports na Musanze FC ariko nta kipe n’imwe bigeze babasha kumvikana ngo ayerekezemo.
Muri iki cyumweru nibwo yabajije ubuyobozi bwa Rayon Sports burangajwe imbere na Rtd Capt Uwayezu Jean Fidele ahazaza he, maze bamusaba ko yabanza akaza mu igeragezwa naritsinda akaba aribwo azongererwa amasezerano y’imyaka ibiri, kuri ubu akaba yaramaze gutangira igeragezwa kandi amahirwe menshi ni uko azaritsinda.
Sekamana Maxime w’imyaka 26 y’amavuko yazamukiye mu ikipe ya APR FC anayikinira imyaka ikabakaba 10, tariki 2 Nyakanga 2019 akaba aribwo yasezerewe mu bakinnyi batari baratanze umusaruro mwiza ari kumwe na bagenzi be 15.
Nyuma yo kwirukanwa mu Ikipe y’Ingabo z’Igihugu yahise yerekeza muri Rayon Sports aho ayimazemo imyaka ibiri, gusa umwaka ushize w’imikino 2020-2021 ntabwo yigeze abona umwanya uhagije wo gukina.
