Manchester City yegukanye Carabao Cup inyagiye Arsenal
Manchester City itwaye igikombe cya mbere muri uyu mwaka w’imikino, nyuma yo kwihererana Arsenal ikayitsinda ibitego 3-0 ku mukino wa nyuma ya Carabao Cup.
Ikipe ya Arsenal yageze ku mukino wa nyuma isezereye Chelsea, mu gihe Manchester City yari yasezereye ikipe ya Bristol City ku giteranyo cy’ibitego 5-3, mbere yo kugakatisha tike yerekeza I Wembley kuri Stade y’igihugu y’Ubwongereza.
Ibifashijwemo na Sergio Kunu Aguero ku munota wa 18, Vincent Kompany ku wa 58 na David Silva ku munota wa 65, Manchester City yegukanye Carabao Cup nanone izwi nka EFL (English Football League) nyuma yo gutsinda Arsenal ya Arsene Wenger ibitego 3-0.
Ibi biza bishumangira ubushongore n’ubukaka iyi kipe y’umutoza Pep Guardiola ifite, dore ko inafite amahirwe yo kwegukana igikombe cya shampiyona y’abongereza yamaze gutsindwamo umukino umwe rukumbi.
Sergio Kunu Aguero yatangaje ko gutwara Carabao ari ingenzi kuri Manchester City, gusa ngo nanone bagomba gukomeza kurwana haba imbere mu Bwongereza ndetse no kuruhando rw’uburayi, nk’uko yabitangarije Sky Sports.
Manchester City yiyongereye kuri Aston Villa, Chelsea na Manchester United zifite iki gikombe incuro 5, mu gihe Liverpool igifite kenshi yagitwaye incuro umunani zose.
Aya makipe ya Man City azongera gucakirana ku wa kane w’iki cyumweru muri shampiyona, aho Arsenal izaba yakiririye Man City kuri Emirates Stadium, mbere y’uko iyi City yakira Chelsea nanone mu mpera z’iki cyumweru.
