Liverpool yandaje Arsenal ikomeza kwirukanka ku gikombe cya shampiyona

Umukino w’umunsi wa 20 wa shampiyona y’Abongereza wahuzaga Liverpool na Arsenal, urangiye Liverpool itsinze 5-1 ikomeza kuyobora urutonde rwa shampiyona by’agateganyo.

Ni umukino wabereye i Anfield ku kibuga cy’ikipe ya Liverpool.

Ikipe ya Arsenal ni yo yatangiranye igitego ibifashijwemo na Ainsley Maitland-Niles. Hari ku munota wa 11 w’umukino.

Iki gitego cyaje kwishyurwa na Roberto Firmino ku munota wa 14 w’umukino, yongeramo icya kabiri ku wa 15 w’umukino. Igitego cya gatatu cya Liverpool cyatsinzwe na Sadio Mane ku munota wa 32, mbere y’uko Mohamed Salah atsinda icya kane kuri Penaliti mu minota ibiri yari ishyizwe ku gice cya mbere.

Umunya-Brazil Roberto Firmino wari wishe cyane Arsenal yatsinze igitego cya gatanu cya Liverpool ku munota wa 65 kuri Penaliti, yuzuza ibitego bitatu yatsinze muri uyu mukino.

Muri rusange ikipe ya Arsenal yarushijwe ku buryo bugaragara.

Gutsinda uyu mukino byafashije Liverpool gukomeza kuyobora shampiyona y’Abongereza, magingo aya ikaba irusha amanota icyenda Tottenham iyikurikiye ku rutonde rwa shampiyona. Liverpool kandi ikomeje urugendo rwo kureba niba yakuraho amateka y’imyaka 27 imaze idatwara igikombe cya shampiyona y’Abongereza.