Jacques Tuyisenge utajya asiba gutsinda ibitego yafashije Gor Mahia kwisengerera Abarabu
Ikipe ya Gor Mahia yo mu gihugu cya Kenya yisengereye Hussein Dey yo muri Algeria iyitsinda ibitego 2-0, mu mukino wa Total CAF Confederations Cup rutahizamu Jacques Tuyisenge yatsinzemo igitego.
Hari mu mukino wabereye kuri Stade ya Kasarani i Nairobi. Raila Odinga uzwi cyane muri Politiki ya Kenya yari mu bari baje gushyigikira iyi kipe ya mbere ikunzwe muri Kenya.
Gor Mahia yaje muri uyu mukino imeze nk’intare yakomeretse, nyuma yo gutsindirwa muri Angola na Petro Atletico yo muri iki gihugu ku bitego 2-1.
Umukino wa Gor Mahia na Hussein Dey waranzwe cyane no gutinza imikino kuri iyi kipe yo muri Algeria yifuzaga gukura byibura inota rimwe i Nairobi.
Amayeri abanya-Algeria bari bazanye yarangiye ku munota wa 86 w’umukino ubwo Francis Kahata yatsindiraga Gor Mahia igitego cya mbere.
Mu minota y’inyongera, Jacques Tuyisenge utajya yiburira yaje gutsindira Gor Mahia igitego cya kabiri ari na cyo cyahise kirangiza uyu mukino.
Insinzi Gor Mahia yaboneye imbere y’abafana bayo yahise iyisubiza ku mwanya wa mbere mu tsinda D n’amanota atandatu, mu gihe hagitegerejwe ibiva mu mukino wa Zamalek na Petro Atletico.
