Umuraperi A.Y yakoye umukobwa w’ umunyarwandakazi, Senderi yongeye gutungurana
Ambwene Allen Yessayah , umuraperi wamenyekanye cyane nka A.Y muri tanzaniya yakoye umukobwa w’ Umunyarwandakazi witwa Remmy mu birori byabereye i Nyamata.
Ubukwe bw’uyu musore w’imyaka 36 bwabereye kuri Golden Tulip Hotel hariya i Nyamata, ahabereye ubu bukwe hari harinzwe cyane ku buryo bukomeye yewe no gufotora ntabwo byari byemewe dore ko nta munyamakuru cyangwa umufotozi wigenga wari wemerewe kuhagera.
Umuhanzi Senderi International Hit yatunguranye muri ubu bukwe anaburirimbamo indirimbo yahimbiye Remy n’umugabo we AY.
Mbere yo kuririmba, Senderi yagize ati “Ababyeyi banjye ntabwo naririmba batanyemereye, nabanje kubasaba uruhushya. Ndashaka twerekane ko Hit ihora ari Hit, Afurika yose babibone, Tanzania yose by’umwihariko Mbeya.”
A.Y n’umuryango we basabye umugeni bahagarariwe n’uwitwa Bizima. Nyuma y’umuhango wo gusaba no gukwa hazakurikiraho gusezerana mu musigiti mu muhango uzabera i Dar es Salaam tariki ya 24 Gashyantare 2018.
