USA YITEGUYE UBWUMVIKANE NA DR CONGO KU MUTUNGO KAMERE
Leta Zunze Ubumwe za Amerika zagaragaje ubushake bwo kugirana amasezerano ajyanye n’ubufatanye mu bucukuzi bw’ibikoresho by’ingenzi hamwe na Repubulika Iharanira Demokarasi ya Congo (RDC).
Ibi biza mu gihe ubutegetsi bwa Donald Trump, binyuze muri gahunda ye yiswe America First, bukomeje gushaka uko bwakwemeza umutekano w’ibikoresho by’ingenzi nk’ibura (cobalt), lithium, na uranium—byose bikaba ari ingenzi mu ikoranabuhanga rigezweho, cyane cyane mu gukora bateri z’imodoka zikoresha amashanyarazi, ibikoresho bya gisirikare, n’ingufu za nikleyeri.
Repubulika Iharanira Demokarasi ya Congo ni igihugu gifite umutungo kamere utagira uko ungana, by’umwihariko igizwe na 70% by’amabuye y’agaciro akoreshwa ku isi yose.
Ariko, igihugu cyakunze kugira imbogamizi zikomeye mu gucunga uyu mutungo, ahanini bitewe n’ibibazo bya ruswa, imicungire mibi, n’umutekano mucye mu bice bicukurwamo amabuye y’agaciro.
Guverinoma ya Congo imaze iminsi mu biganiro n’abayobozi ba Amerika, aho yifuza kugira ubufatanye buhagije aho kudashingira ku bashoramari bamwe gusa.
Itsinda ry’intumwa za Congo riherutse kujya i Washington kugira ngo ibiganiro birusheho gukomera, naho mu nzego zitandukanye ibiganiro byimbitse bikomeje kuba.
RDC ifite impamvu nyinshi zituma ishaka ubu bufatanye n’Amerika. Ku ikubitiro, irashaka kwagura amasoko yayo kuko isanzwe ifitanye imikoranire myinshi n’Ubushinwa, bityo igashaka uko yagabanya igitutu cy’Ubushinwa no kugira andi masoko yizewe.
Indi mpamvu ni uguteza imbere ubucukuzi bw’amabuye y’agaciro binyuze mu mikoranire n’ibihugu bikomeye bifite ikoranabuhanga rihambaye mu bucukuzi no gutunganya umutungo kamere.
Ku rundi ruhande, RDC irashaka kugira uruhare runini mu gucunga umutungo wayo kuko hari amasezerano mpuzamahanga yahaye inyungu nyinshi amasoko mpuzamahanga kurusha igihugu ubwacyo.
Kunoza umutekano n’iterambere ry’abaturage na byo biri mu byihutirwa, kuko ubucukuzi bw’amabuye y’agaciro bukorwa ahenshi n’abaturage batagira ibikoresho bihagije kandi akenshi buteza amakimbirane.
Ni mu gihe n’igihugu cya Ukraine kiri mu biganiro n’Amerika ku masezerano nk’aya, bikaba bigaragaza uburyo Amerika ikomeje gushaka uko yagira uruhare rukomeye mu guhangana ku mutungo kamere ku rwego rw’isi.
Nka kimwe mu bihugu bikomeje guhangana n’Ubushinwa ku bukungu, Amerika irashaka kwihutisha aya masezerano kugira ngo yirinde kugwa inyuma mu ruhando mpuzamahanga.
Iyi mikoranire hagati ya RDC na USA iramutse igeze ku musozo, yaba impinduka ikomeye mu bijyanye n’ubucukuzi bw’amabuye y’agaciro ku isi, ndetse ikagira ingaruka ku bikoresho bikoreshwa mu ikoranabuhanga rihambaye n’ubukungu mpuzamahanga.
Ni mu gihe kandi hari andi makuru avuga ko ibi byose Perezida Tshisekedi arikurwana no kubikora ,kugura ngo America icukure aya mabuye nayo imufashe kurwanya umutwe wa M23 n’u Rwanda ashinja kuwufasha.
