Rayon Sports yatsikiye kuri Rutsiro FC
Imikino y’umunsi wa kabiri wa shampiyona yakinwe kuri uyu wa Gatatu, yasize Rayon Sports itakaje amanota ya mbere nyuma yo kugwa miswi na Rutsiro ibitego 2-2, mu gihe APR FC yatsinze Musanze FC ibitego 2-0.
Rayon Sports yari yasuye Rutsiro FC mu mukino w’umunsi wa kabiri wa shampiyona wabereye kuri Stade Umuganda i Rubavu.
Mu minota 24 ya mbere y’umukino Willy Essombe Onana na Nizigiyimana Karim Makenzie bari bafashije Rayon Sports kuyobora umukino, gusa birangira ikipe ya Rutsiro FC yishyuye.
Onana yafunguriye Rayon Sports amazamu kuri penaliti yo ku munota wa karindwi w’umukino, mbere y’uko Mackenzie ayitsindira igitego cya kabiri ku munota wa 24 w’umukino.
Rutsiro FC yagabanyije umwenda ku munota wa 45 w’umukino ibifashijwemo n’Umurundi Ndarusanze Jean Claude, amakipe yombi ajya kuruhuka Rayon Sports iri imbere n’ibitego 2-1.
Ndarusanze yishyuriye Rutsiro FC ku munota wa 92, nyuma gato y’uko umunyezamu Hategekimana Bonheur yari amaze kwerekwa ikarita itukura azira gutsinza umukino.
Rayon Sports yatsikiye imbere ya Rutsiro mu gihe mukeba wayo APR FC yafashwaga na Djabel Manishimwe na Ruboneka Jean Bosco gutsinda Musanze FC ibitego 2-0.
Mu yindi mikino: Bugesera FC yatsinze Etincelles ibitego 3-1, Gicumbi FC itsinda Etoile de l’Est ibitego 2-0.
