Mu mafoto umuramyi Serge yakoze ubukwe n’umukunzi we

Umuhanzi mu ndirimbo zo kuramya no guhimbaza Imana wamenyekanye nka Serge Iyamuremye yasezeranye imbere y’Imana n’umukunzi we bemeranya kubana akaramata nk’umugore n’umugabo.

Umuhango w’ubukwe bwaba bombi wabaye kuri uyu wa 1 Mutarama 2023 muri Leta zunze ubumwe z’Amerika aho uyu muhanzi aherutse kwerekeza asanzeyo umukunzi we wari usanzwe ahatuye.

Ni mu bbirori byabereye muri MCM Elegante Hotel iherereye i Dallas muri Leta ya Texas nkuko bari babigaragaje ku nteguza y’ubukwe bwabo.

Muri Nyakanga 2022 nibwo Iyamuremye yerekeje muri Leta Zunze Ubumwe za Amerika aho byavugwaga ko agiye gusura umukunzi we, icyakora ku rundi ruhande hari abahamyaga ko yaba yimutse burundu.

Ni urugendo uyu muhanzi yakoze nyuma y’umwaka havuzwe amakuru y’uko yaba yarakoye akanasaba umukunzi we mu birori byabaye mu mpeshyi ya 2021.

Ibirori byo gusaba no gukwa byabereye mu Rwanda ubwo umukunzi we yari mu rw’imisozi igihumbi, icyakora byagizwe ibanga rikomeye kuko na bake bari batumiwe basabwe kudafata amafoto ndetse nabo ubwabo ayo bafashe bakaba batarigeze bayasohora.

Nyuma yo kugera muri Leta Zunze Ubumwe za Amerika, Iyamuremye n’umukunzi we bahise batangira imyiteguro y’ubukwe bwabo.

Iyamuremye ni umwe mu bahanzi bafite izina rikomeye mu muziki wo kuramya no guhimbaza Imana. Azwi cyane mu ndirimbo nka Yesu agarutse yakoranye na James & Daniella, Biramvura, Urugendo yakoranye na Israel Mbonyi n’izindi nyinshi.

Comments

comments