Jurgen Klopp yafashije Liverpool kugera ku byo yari yarananiwe mu myaka 127 yose
Ikipe ya Liverpool y’umutoza Jurgen Klopp, yaraye itsinze Burnely ibitego 3-0 mu mukino w’umunsi wa kane wa shampiyona y’Abongereza, ica agahigo yaherukaga gukora mu myaka 127 ishize muri shampiyona y’Abongereza.
Ibitego bya Chris Wood witsinze, Sadio Mane na Roberto Firmino ni byo byafashije Liverpool kwegukana amanota atatu yatumye ikomeza kuyobora shampiyona y’Abongereza m’amanota 12 kuri 12.
Ibi bitego kandi byafashije iyi kipe gutsinda umukino wa 13 wa shampiyona yikurikiranya, ica agahigo yaherukaga gukora mu myaka 127 ishize. Cyakora cyo mu mwaka w’imikino wa 1989-1990 ubwo iheruka gutwara igikombe cya shampiyona y’Abongereza, Liverpool yari yashoboye gutsinda imikino 12 ya shampiyona yikurikiranya.
Liverpool iheruka gutsindwa umukino muri shampiyona y’Abongereza muri Mutarama itsindwa na Manchester City ibitego 2-1.
Liverpool kandi yaciye agahigo kari kari kamaze imyaka 59, kuko nta kipe n’imwe yari yarashoboye gutsindira Burnley ku kibuga cyayo cya Turf Moor ibitego 3-0, muri shampiyona y’Abongereza.
Ni mu gihe rutahizamu Roberto Firmino we yaciye agahigo ko kuba umukinnyi wa mbere ukomoka muri Brazil ushoboye gutsinda ibitego 50 muri shampiyona y’Abongereza. Abandi Banya-Brazil bagiye batsinda ibitego byinshi muri iyi shampiyona barimo Philippe Coutinho watsinze 41 akinira Liverpool, Juninho watsinze 29 akinira Middlesbrough, mu gihe Willian ukinira Chelsea amaze gutsinda ibitego 28 anganya na Gabriel Jesus ukinira Man City.
