Ikipe ya Villarreal yacumise icumu imitima y’abakunzi ba Manchester United
Ikipe ya Villarreal irangajwe imbere n’umutoz wayo Unai Emery, baraye bakuye amata ku munwa abakunzi ba Manchester united nyuma yo kuyitwara bigoranye cyane, igikombe cya Europa League.
Umukino warangiye amakipe yose anganya igitego 1-1,hifashishwa inyongera y’iminota 30 nayo irangira nta mpinduka, hifashishwa penelite zagombaga gukemura impaka byanze bikunze, birangira Villarreal iyirushije amahirwe yinjiza 11-10.
Kuri uyu wa Gatatu nibwo habaye umukino wa nyuma wa Europa League wahuje Manchester United na Villarreal ariko warangiye iyi kipe yo muri Espagne ariyo itahanye igikombe.
Manchester United yashakaga kwisubiza iki gikombe yaherukaga muri 2017 ariko ntibyayikundiye kuko penaliti yahushijwe na David de Gea yatumye itabasha kubigeraho.
Villareal niyo yafunguye amazamu ku munota wa 29 ku gitego cyatsinzwe na Gerard Moreno ndetse iki gitego nicyo cyabonetse mu gice cya mbere.
Mu gice cya kabiri,United yaje yariye karungu bituma ku munota wa 55 yishyura iki gitego ibifashijwemo na Edinson Cavani.
United yagerageje kuyobora uyu mukino mu minota 90 ariko ntiyabasha kubona igitego cy’intsinzi cyane ko n’umutoza Ole Gunnar Solskjaer atigeze agerageza gukora impinduka.
Nyuma y’iminota 90,hongeweho 30 yabaye ingorabahizi kuri buri ruhande kugeza ubwo hitabajwe za penaliti zitari zoroshye ku banyezamu b’amakipe yombi,gusa byarangiye zihiriye Villarreal.
Amakipe yose yateye amapenaliti abakinnyi bose bari mu kibuga barazinjiza kugeza ubwo abanyezamu bombi bateranye aho Geronimo Rulli yayinjije mu gihe David de Gea yayihushije.Iki nicyo gikombe cya mbere cy’i Burayi Villarreal itwaye.
Unai Emery abaye umutoza wa mbere utwaye inshuro 4 ibikombe bya UEFA Cup/Europa League (2013-14, 2014-15, 2015-16 & 2020-21). inshuro eshatu ziheruka yabikoze ari muri Sevilla.
Ikipe ya Manchester United imaze gutsindirwa kuri penaliti inshuro 6 muri 7 iheruka gutera mu marushanwa yose aheruka.
Villarreal yabaye ikipe ya 10 yo muri Espagne, itsindiye ku mukino wa nyuma iyo mu Bwongereza mu irushanwa ry’u Burayi. Muri izo nshuro harimo ebyiri Manchester United yatsinzwemo na FC Barcelone muri Champions League.
Abakinnyi babanje mu kibuga ku mpande zombi n’ababasimbuye bari mu dukubo:
Villarreal: Rulli, Foyth (Gaspar 88), Albiol, Pau Torres, Pedraza (Moreno 88), Parejo, Capoue (Raba 120+3), Trigueros (Gomez 77), G. Moreno, Bacca (Coquelin 60), Pino (Alcacer 77)
Manchester United: De Gea, Wan-Bissaka (Mata 120+3), Bailly (Tuanzebe 115), Lindelof, Shaw, McTominay (Telles 120+3), Pogba (James 115), Greenwood (Fred 100), Fernandes, Rashford, Cavani.
