Gukeka Coronavirus mu bakinnyi ba Arsenal byatumye umukino wayo na Manchester City usubikwa
Umukino wagombaga guhuza Manchester City na Arsenal wasubitswe kubera gukeka ko abakinnyi ba Arsenal baba baranduye Coronavirus ndetse basabwa kumara iwabo mu ngo igihe kingana n’iminsi 14 badasohoka.
Impamvu uyu mukino wasubitswe ni uko hari impungenge z’uko abakinnyi ba Arsenal bashobora kuba bafite Coronavirus kubera ko bahuye n’umuherwe Evangelos Marinakis wa Olympiacos ubwo aya makipe yombi yahuriraga mu mukino wa Europa League mu minsi 13 ishize nyuma abaganga bakemeza ko uyu muherwe yanduye Coronavirus.
Abaganga bagiriye inama Arsenal ko kuba barahuye na Evangelos bishobora kugira uruhare mu gukwirakwiza iki cyorezo cyateye ubwoba abantu bose ku Isi, ni yo mpamvu bagendeye ku mabwiriza ya Leta y’u bwongereza avuga ko umuntu wese wagize aho ahurira n’umuntu wanduye Coronavirus agomba gushyirwa mu kato akaguma murugo iwe mu gihe cy’iminsi 14 uhereye igihe yahuriye n’uwanduye.
Abakinnyi bose ba Arsenal bagomba kuguma murugo kugeza iminsi 14 ishize ndetse n’abayobozi bane ba Arsenal bari bicaye hafi y’uyu mugabo bagomba kubahiriza ibi.
Ubuyobozi bwa Arsenal bwatangaje ko bubabajwe n’izi mpinduka kuko hari abari bateze bagiye i Manchester kureba uyu mukino ndetse itangaza ko amatike bari baguze arakomeza kugira agaciro kugeza umukino ubaye.
Evangelos Marinakis wasanzweho iki cyorezo w’imyaka 52 afite n’indi kipe mu Bwongereza abereye umuyobozi yitwa Nottingham Forest yo mu cyiciro cya 2.
Iyi nkuru yavuye ku rubuga rwa Arsenal
