Goma : Itsinda ry’abaganga ryerekanye umugore n’umwana we bakize Ebola
Abashinzwe ubuzima muri Repubukika Iharanira Demokarasi ya Congo hamwe n’ishami ry’umuryango w’abibumbye ryita ku buzima, muri iki gitondo cya taliki ya 13 Kanama mu mujyi wa Goma bagaragaje Eben-Ezer na nyina Espérance bakize indwara ya Ebola.
Uyu mugore n’umwana we, ni babiri mu bantu bane bafashwe na Ebola mu mujyi wa Goma, babiri bandi yarabahitanye , BBC ivuga ko mu bo Ebola yahitanye harimo umugabo we, uyu yari abaye umuntu wa kabiri basanzemo Ebola mu mujyi wa Goma.
Berekanywe uyu munsi mu kiganiro n’abanyamakuru i Goma nk’abantu bakize Ebola bakijijwe n’imiti iri mu igeragezwa. Eben-Ezer utaruzuza imyaka ibiri na nyina Espérance bamaze iminsi bavurirwa mu kigo cyagenewe kwita ku bafashwe n’abakekwaho iki cyorezo i Goma.
Dr Sabue Mulangu inzobere muri Ebola, aganira n’itangazamakuru yavuze ko aba bombi ubu bashobora gusubira mu miryango yabo kuko bakize neza, yakomeje avuga ko ku bantu 681 bakoreweho igeragezwa ry’iyi miti ya Ebola 60% bari kuyikira.
Ni inkuru nziza ku bakozi bo mu nzego z’ubuzima no ku baturage b’imijyi ya Goma na Gisenyi mu Rwanda ubu itakigenderanira cyane nk’ibisanzwe kubera ubwoba bw’iki cyorezo,
