Floyd Mayweather na Manny Pacquiao bagiye kongera kurwana
Manny Pacquiao yatangaje ko Floyd Mayweather yamwegereye akamusaba ko bakongera bakarwana mu mukino w’iteramakofe nyuma y’uko yamuhondaguye mu 2015 ariko Pacquiao akamusubiza ko azamuha igisubizo muri uyu mwaka.
Aganira na New York ubwo yabazwaga ku murwano afitanye na Adrien Broner muri Mutarama 2019, Pacquiao yavuze ko muri Nzeli uyu mwaka yahuriye na Mayweather mu Buyapani bakaganira uburyo bakongera guhangana agahita asezera ku mukino w’iteramakofe.
Uyu murwano Pacquiao afitanye na Adrien Jerome Broner ukomoka muri Leta Zunze Ubumwe za Amerika tariki 19 Mutarama 2019, niwo uzagaragaza umukinnyi wa mbere ku Isi mu iteramakofe.
“Ubwo mperuka guhurira na Floyd Mayweather mu Buyapani, twaraganiriye ambwira ko ashaka gusezera umukino w’iteramakofe twongeye guhura. Niba hari ikintu nzi n’ukujya muri ringi ngakina, Floyd yambwiye ko azahita asezera, tuzaba tureba nyuma y’uyu murwano” Pacquiao aganira n’abanyamakuru.
Tariki 2 Gicurasi 2015 muri MGM Grand Garden Arena mu Mujyi wa Las Vegas habereye umukino w’amateka mu mukino w’iteramakofe, wahuje ibihangange muri uyu mukino Umunya- Philippines, Emmanuel Dapidran Pacquiao bita ‘Manny’ na Floyd Joy Mayweather Jr ukomoka muri Leta Zunze Ubumwe za Amerika.
Intsinzi yatashye kuri Floyd Mayweather bituma aca agahigo mu mukino w’iteramakofe aho yahembwe miliyoni 150 z’amadolari ya Leta Zunze Ubumwe za Amerika naho Pacquiao watsinzwe ahabwa miliyoni 100.
Nyuma y’uyu mukino Floyd Mayweather yamenyesheje impuzamashyirahamwe y’umukino w’iteramakofe ku Isi (World Boxing Council, WBC) ko asezeye ku gukina nk’uwabigize umwuga ariko ashobora kugaruka mu kibuga nkuko byatangajwe na Manny Pacquiao wemeza ko bahuye bakaganira ku kuba bakongera guhangana mu 2019.
Nyuma y’umurwano wa 2015 utazibagirana mu mateka y’Isi Floyd yagaragaye mu kibuga inshuro imwe gusa ubwo yatsindaga Umunya-Ireland, Conor MacGregor muri Kanama 2017.
