Etoile de l’Est yari yisasiye APR FC habura gato

Ikipe ya APR FC yaguye miswi na Etoile de l’Est ibitego 2-2, iyikuraho inota rimwe yiyushye akuya.

Iyi kipe y’Ingabo z’igihugu yari yasuye Etoile de l’Est kuri Stade ya Ngoma, mu mukino w’umunsi wa 10 wa shampiyona.

Ni umukino iyi kipe yakinnye idafite abatoza bayo banduye icyorezo cya COVID-19, biba ngombwa ko yiyambaza Mugabo Alex usanzwe ari umutoza w’abanyezamu bayo na Kapiteni Jacques Tuyisenge ngo abe ari bo bayitoza.

Mu minota 13 ya mbere y’umukino Etoile de l’Est yari yamaze kuyobora umukino, nyuma yo gutsindirwa ibitego bibiri n’umunya-Nigeria, Peter Agblevor.

Byasabye abakinnyi ba APR FC kwiyuha akuya kugira ngo babashe kwishyura ibi bitego byombi, dore ko Etoile de l’Est y’umutoza Banamwana Camarade na yo yanyuzagamo igahiga igitego cya gatatu.

APR FC yagabanyije umwenda ku munota wa 19 w’umukino ibifashijwemo na Mugunga Yves.

Nyuma yo kotsa igitutu Etoile de l’Est mu gice cya kabiri cy’umukino, byasabye umunota wa 81 w’umukino ngo APR FC yari yagiye ihusha uburyo bwinshi ibashe kugombora ibifashijwemo na rutahizamu Yannick Bizimana.

Kunganya na Etoile de l’Est byatumye APR FC yuzuza amanota 17, inashyiraho agahigo k’imikino 44 imaze idatsindwa.

Comments

comments

Hirwa Patrick

Hirwa Patrick is a writer of Teradignews.rw since October 2021. He studied Journalism and Communication at University of Rwanda, School of Journalism and Communication.