Champions League: Liverpool yasezerewe na Atlético , PSG isezerera Borussia Dortmund
Liverpool ifite igikombe giheruka cya UEFA Champion League, yaraye isezerewe muri iri rushanwa rihuza amakipe yabaye aya mbere iwayo ku mugabane w’i Burayi, itsindiwe mu Bwongereza na Atlético Madrid ibitego 3-2 mu mukino wo kwishyura wa 1/8.
Umukino ubanza wari wabereye muri Espagne mu byumweru bibiri bishize, wari warangiye Atlético Madrid itsinze igitego 1-0.
Liverpool yari ifite umukoro ukomeye wo kwikura imbere y’iyi kipe yo muri Espagne ifite ubwugarizi bukomeye mu gihe kubura umunyezamu Alisson Becker wavunitse, byari byitezwe ko bigurisha iyi kipe yo mu Bwongereza yakoresheje Adrian.
Imikino 90 isanzwe y’uyu mukino wo ku wa Gatatu, yahiriye Liverpool yabonyemo igitego cya Georginio Wijnaldum ku munota wa 43 ndetse yashoboraga gutsinda icya kabiri mu minota ya nyuma, umupira watejwe umutwe na Andrew Robertson ukubita igiti cy’izamu.
Imikino 30 yongereweho ubwo amakipe yombi yanganyaga igitego 1-1 mu mikino yombi, ni yo yabaye ikinyuranyo bituma Liverpool isezererwa.
Icyizere cy’iyi kipe yo mu Bwongereza, cyari kiyongereye ubwo Roberto Firmino yatsindaga igitego cya kabiri ku munota wa kane, ariko Marcos Llorente atsindira Atlético Madrid ku munota wa 97 n’uwa 105 mbere y’uko Alvaro Morata ashimangira intsinzi ku munota wa 120.
Liverpool yari imbere y’abafana bayo, yasezerewe itsinzwe ibitego 3-2 (4-2 mu mikino yombi).
Undi mukino wabaye kuri uyu wa Gatatu wasize Paris Saint-Germain yo mu Bufaransa nayo igeze muri ¼ nyuma yo gutsinda Borussia Dortmund yo mu Budage ibitego 2-0.
Neymar yatsinze igitego cya mbere ku munota wa 28 mbere y’uko Juan Bernat atsinda icya kabiri cyahaye ab’i Paris icyizere cyo gukomeza ku bitego 3-2 muri uyu mukino wabereye mu muhezo mu rwego rwo kwirinda coronavirus.
Atlético Madrid na PSG ziyongereye kuri RB Leipzig yo mu Budage na Atalanta yo mu Butaliyani, zombi zabonye itike ya ¼ ku wa Kabiri.
UEFA Champions League izakomeza mu cyumweru gitaha hakinwa imikino ine ya 1/8 isigaye, aho itatu muri iyo (Juventus na Lyon, FC Barcelone na Napoli, Bayern Munich na Chelsea) izabera mu muhezo mu rwego rwo kwirinda coronavirus. Umukino uzahuza Manchester City na Real Madrid kuri ubu wo uracyemerewe kubera imbere y’abafana.
