Cassa Mbungo yatakaje umukino wa kabiri imbere y’ikipe ya Gor Mahia

Cassa Mbungo Andre uherutse kugirwa umutoza mukuru wa AFC Leopards yo muri Kenya, yatakaje umukino wa kabiri nk’umutoza w’iyi kipe atsindwa na Gor Mahia ibitego 2-0.

Hari mu mukino uzwi nka “Mashemeji Derby” ikipe ya AFC Leopards yari yahuriyemo na Gor Mahia basanzwe bazirana urunuka. Uyu mukino wa shampiyona ya Kenya wabereye kuri Stade ya Kasarani iherereye i Nairobi mu murwa mukuru wa Kenya.

Ni nyuma y’uko Cassa yari yatakaje umukino wa mbere yatoje AFC Leopards atsindwa 2-1 na Mt Kenya.

Muri uyu mukino, Abakinnyi barimo Ndayishimiye Eric Bakame na Wayi Yeka bari babanje mu kibuga ku ruhande rwa AFC Leopards ya Cassa Mbungo Andre, mu gihe rutahizamu Jacques Tuyisenge yari ayoboye ubusatirizi bwa Gor Mahia.

Gor Mahia yari yakiriye uyu mukino yafunguye amazamu ku munota wa 15 ibifashijwemo na Kenneth Muguna, ijya no kuruhuka ikiri imbere n’igitego kimwe ku busa bwa Ingwe.

Iyi kipe yatsinze igitego cya kabiri ku munota wa 64 ibifashijwemo na Francis Kahata.

Gutsinda uyu mukino byafashije Gor Mahia kunganya imikino yo na AFC Leopards zimaze gutsindana. Amakipe yombi amaze gutsindana incuro 27 mu mikino 86 amaze gukina.

Amanota atatu yo kuri uyu mukino kandi yafashije Gor Mahia gufata umwanya wa kabiri ku rutonde rwa shampiyona n’amanota 22, amanota abiri inyuma y’ikipe ya Mathare United iyoboye shampiyona ya Kenya. Cyakora cyo iyi Gor Mahia iracyanafite umukino w’ikirarane igomba gukina.

Comments

comments

Hirwa Patrick

Hirwa Patrick is a writer of Teradignews.rw since October 2021. He studied Journalism and Communication at University of Rwanda, School of Journalism and Communication.