UEFA Champions league: Messi yarokoye PSG yari yanizwe na Leipzig

Ikipe ya Paris Saint-Germain ibifashijwemo ahanini na Lionel Messi, yatsinze Leipzig yo mu Budage ibitego 3-2 mu mukino wari uw’ishiraniro.

Amakipe yombi yari yahuriye mu mukino wa gatatu wo mu tsinda A wabereye i Parc des Princes.

Umunota wa cyenda wonyine wari uhagije ngo Kylian Mbappé atsindire Paris igitego cya mbere, mbere y’uko umunya-Portugal André Silva acyishyura ku munota wa 28.

Amakipe yombi yagiye kuruhuka anganya igitego 1-1, gusa Leipzig ni yo yari yahushije uburyo bwinshi bugaragara imbere y’izamu rya Keylor Navas, dore ko hari n’umupira yateye ukagarurwa n’igiti cy’izamu.

Iyi kipe y’umutoza Jesse Marsch yatsinze igitego cya kabiri ku munota wa 57 ibifashijwemo n’Umufaransa Nurdi Mukiele, ku mupira yari ahinduriwe na Angeliño wahoze akinira Manchester City.

Byasabye ko Messi na Mbappé bafata inshingano zo kuyobora uriya mukino, binajyanye n’uko batari hamwe na mugenzi wabo Neymar wavunikiye mu kipe y’igihugu ya Brésil.

Byasabye umunota wa 66 w’umukino kugira ngo Lionel Messi yishyurire PSG, ku mupira Mbappé yateye ugarurwa n’igiti cy’izamu mbere y’uko uyu munya-Argentine awusonga mu izamu ryari rirangaye.

Messi yahesheje intsinzi PSG ku munota wa 74 kuri penaliti yo bwoko bwa panenka yateye, nyuma y’uko Mbappé yari amaze guhirikwa mu rubuga rw’amahina.

Mu minota ya nyuma y’umukino Messi yashoboraga gutsinda igitego cye cya gatatu muri uriya mukino, gusa indi penaliti PSG yabonye ayiharira Mbappé wayiteye hejuru y’izamu.

Paris Saint-Germain kuri ubu iyoboye itsinda n’amanota arindwi, mu gihe Manchester City yanyagiye Club Brugge ibitego 5-1 iyigwa mu ntege n’amanota atandatu.

Mu yindi mikino yaraye ibaye harimo uwa Liverpool yagiye gutsindira Atlético Madrid i Wanda Metropolitano ibitego 3-2.

Ibitego bya Atlético byombi byatsinzwe n’Umufaransa Antoine Griezmann, mbere yo kwerekwa ikarita itukura ku munota wa 52.

Griezmann yahise aca agahigo kabi ko kuba umukinnyi wa mbere mu mateka ya UEFA Champions league utsinze ibitego bibiri akanerekwa ikarita itukura.