U Bwongereza bwakumiriye indege zose za Boeing 737 MAX

Igihugu cy’u Bwongereza kiri mubihugu byo kumugabane w’i Burayi bwafashe umwanzuro wo gukumira mu kirere cyabwo indege zose zo mu bwoko bwa Boeing 737 MAX.

Ibi bije nyuma y’impanuka y’indege ya Boeing Max 8 ya Sosiyete ya Ethiopian Airlines yabaye ku Cyumweru igahitana ubuzima bw’abantu bose bari bayirimo uko ari 157.

Indege zo muri ubu bwoko bwa Boeing 737 MAX zimaze gukora impanuka ebyiri zikomeye mu mezi atanu gusa, ibi byatumye ikigo gishinzwe indege za gisivili (CAA) gifata uyu mwanzuro wo kuba gihagaritse izi ndege, mu gihe ibihugu birimo Malaysia, u Bushinwa, Australia na Singapore nabyo byamaze gukumira ikoreshwa ry’ubu bwoko bw’izi ndege.

Boeing 737 Max ni indege zikorwa n’uruganda rwa Boeing, aho ziri mu byiciro bitandukanye birimo Max 7, 8, 9, na 10. Kugeza mu mpera za Mutarama 2019, hari hamaze kugurishwa Max 8 zigera kuri 350 mu mu zisaga ibihumbi bitanu zatumijwe.

Sosiyete Air Peace yo muri Nigeria yo yavuze ko nta gahunda yo guhagarika kugura indege 10 za 737-MAX 800 yamaze gutumiza. Naho Amerika yo ivuga ko izi ndege zikomeza gukora mu kirere cyayo ntakibazo.

Ikigo gishinzwe indege za gisivili (CAA)  cyavuze ko amabwiriza ku ihagarikwa ry’ikoreshwa ry’izi ndege agomba gukurikizwa kugeza igihe hatangiwe andi. Tui Airways na Norwegian nizo zakoreshaga Boeing Max 8 mu ngendo zo mu Bwongereza.

 

Comments

comments