Uganda na DRC mu rugendo rwo gufatanya guhashya inyeshyamba
Umugaba Mukuru w’Ingabo za Uganda yasuye RDC, aganira na Perezida Tshisekedi ku bufatanye bwo guhashya imitwe yitwaje intwaro
Ku wa 21 Kamena 2025, Umugaba Mukuru w’Ingabo za Uganda, General Muhoozi Kainerugaba, yagiranye ibiganiro byihariye na Perezida wa Repubulika Iharanira Demokarasi ya Congo, Félix Tshisekedi, mu ruzinduko rw’akazi ari kugirira muri icyo gihugu kuva ku wa 20 Kamena.
Ibiganiro byabereye i Kinshasa byibanze ku gufatanya hagati y’ibihugu byombi mu rugamba rwo guhashya imitwe yitwaje intwaro ikomeje guhungabanya umutekano mu Burasirazuba bwa Congo.
Gen. Muhoozi yashimye uburyo ibihugu byombi bikomeje gukorana mu bikorwa byo kurwanya iterabwoba, ashimangira ko ubufatanye bwa gisirikare bugomba gukomezwa no kurushaho kunozwa. Perezida Tshisekedi, unayobora Ingabo za Congo nk’Umugaba w’Ikirenga, yagaragaje ko hari intambwe imaze guterwa ariko ashimangira ko hakenewe imbaraga z’ubufatanye mu kurandura burundu imitwe yitwaje intwaro.
Mbere y’ibi biganiro, ku wa 20 Kamena, Gen. Muhoozi yari yahuye na Lt Gen Jules Banza Mwilambwe, Umugaba Mukuru w’Ingabo za Congo, bagirana ibiganiro birangiye basinyanye amasezerano agamije kongera imbaraga mu bikorwa bya Operation Shujaa.
Iyo gahunda yahuriweho n’ingabo za Uganda (UPDF) n’iza Congo (FARDC) yatangijwe mu 2021, igamije kurwanya umutwe wa Allied Democratic Forces (ADF) uzwiho ibikorwa by’ubugizi bwa nabi. Nyuma y’isuzuma ry’ibyagezweho, hafashwe icyemezo cyo kwagura ibikorwa by’iyo operation, by’umwihariko bigashyirwa no ku mutwe wa CODECO, na wo uvugwaho ubwicanyi bukorerwa abasivile, cyane cyane abo mu moko afitanye isano ya hafi na Uganda.
Uruzinduko rwa Gen. Muhoozi n’ibiganiro yagiranye n’ubuyobozi bwa RDC bigaragaza ubushake bwo gukomeza ubufatanye bw’igisirikare mu guharanira amahoro n’umutekano urambye mu karere.
