Sheebah Karungi yageze i Bruxelles aho agiye guhurira na Bruce Melodie mu gitaramo(Amafoto)

Umuhanzikazi w’icyamamare muri Uganda, Sheebah Karungi, yageze mu Mujyi wa Bruxelles mu gitondo cyo kuri uyu wa 5 Werurwe 2026, aho yagiye kwitabira igitaramo azahuriramo na Bruce Melodie ku wa 7 Werurwe 2026. Mu rugendo rwe yajyanye n’umwana we w’imfura aherutse kwibaruka.

Sheebah yahagurutse ku Kibuga Mpuzamahanga cy’Indege cya Entebbe mu ijoro ryo ku wa 4 Werurwe 2026, ahita yerekeza mu Bubiligi aho yageze mu gitondo cyo kuri uyu wa Kane.

Uyu muhanzikazi utegerejwe n’abakunzi b’umuziki benshi i Burayi, azataramana na Bruce Melodie mu gitaramo kizabera mu Mujyi wa Bruxelles ku wa 7 Werurwe 2026

Amakuru aturuka hafi y’iki gikorwa agaragaza ko Sheebah yahisemo kujyana n’umwana we, bikaba bishoboka ko azanahurira mu Bubiligi n’umugabo bivugwa ko ari se w’uyu mwana, usanzwe atuye mu Bwongereza.

Iki gitaramo cyateguwe na sosiyete ya Zentro Nation iyobowe n’Umunyarwandakazi uzwi nka DJ Zentro uba mu Bubiligi. Biteganyijwe ko kizabera mu nyubako ya Birmingham Palace iri mu Mujyi wa Bruxelles.

DJ Zentro aherutse gutangaza ko iki gitaramo kizaba gifite umwihariko kuko kizahuzwa no kwizihiza Umunsi Mpuzamahanga wahariwe Umugore wizihizwa buri mwaka ku wa 8 Werurwe.

Yagize ati “Intego ni ugusangiza ibyishimo abakunzi b’umuziki baba i Burayi, ariko kandi tukazanabona umwanya wo kwizihiza umunsi mpuzamahanga wahariwe abagore.”

Bruce Melodie we yamaze kugera mu Bubiligi ku wa 3 Werurwe 2026, aho ategura guhura na Sheebah Karungi mu gitaramo bazahuriramo nyuma y’igihe kinini bakoranye indirimbo “Embeera Zo” yakunzwe cyane mu Rwanda no muri Uganda.

Ku ruhande rwa Sheebah Karungi, iki gitaramo kije nyuma y’igihe gito agarutse mu bikorwa bya muzika. Mu minsi yashize yari yarabihagaritse by’igihe gito kubera ko yari atwite ndetse na nyuma yo kwibaruka afata umwanya wo kwita ku mwana we.