Musanze: ibivugwa ku Kimoteri cy’Akarere giherereye mu Murenge wa Cyuve

Nyuma y’uko Akarere gafashe gahunda yo gushyira Ikimoteri cyako mu Mudugudu wa Bubandu, Akagari ka Bukinanyana, umurenge wa Cyuve, habayeho inkurikizi 2 zitandukanye:

I ya mbere yigaragaje ni uko abaturiye icyo Kimoteri babangamiwe n’amasachet , ibimene by’amacupa, ibyuma n’ibindi byose bitabora, bigenda birenga imbibi z’ikimoteri, bikanyanyagira hirya no hino mu mirima y’ abaturage, bityo bikagabanya umusaruro ukomoka ku buhinzi.

Abaturiye iki Kimoteri batunzwe n’umurimo w’ubuhinzi, bakaba basaba Akarere ko kashakisha ahandi kimurira Ikimoteri cya Cyuve, dore ko cyamaze no kuzura, bigaragara ko nta mwanya wundi usigaye bashobora kumenamo imyanda.

Ikimoteri cya Cyuve ku rundi ruhande mu kiganiro twagiranye na bamwe batari abahinzi borozi, baragaragaza ko kuba kiri hariya kibafitiye akamaro.

Aba ni abakozi b’umushinga ushyinzwe gutoranya mur’imwe mu myanda ibora harimo ibishishwa by’ibitoki, iby’ibirayi, iby’imbuto ziribwa nk’amapapayi, ibinyomoro inanas n’ibindi, bakaba bafite imashini ibanza kubistya, nyuma byamara kworoha bikavamo ibiryo by’udusimba bita iminyorogoto, nayo izagaburirwa amwe mu matungo magufi arimo ingurube n’inkoko.

Umwe mu bakozi twaganiriye witwa TWAGIRIMANA Innocent yagize ati:

“” Mu rwego rwo kwihangira umurimo, twasanze tugomba kubyaza umusaruro kino Kimoteri, dukora umushinga wo Kubaka iyi nzu hafi yacyo, dufite intego yo kuzakenera imyanda yose ijyanye n’ibisigazwa by’ibiribwa bibora, kugira ngo tujye tubibyazamo ibishobora gutunga amwe mu matungo magufi Kandi tubone n’ifumbire izajya yoherezwa mu mirima y’abaturage.””

Yakomeje agaragaza ubushake n’umuhate babikorana, atwereka imashini bifashisha batunganya imyanda yo mu bwoko twavuze haruguru, itegurwa mu mabase atandukanye akubiyemo imyanda bisobanurwa ko bagenda bakayanika, ikavamo ifumbire nzIza cyane.

S’ibyo gusa , kuko iki Kimoteri kinafatiye runi abaturage bo muri ako gace, kuko bakibonamo imirimo, bakaba bahembwa amafaranga buri kwezi, bikaba bibafasha mu kwiteza imbere.

Twashoboye kuvugana n’Umuyobozi w’Akarere kuri Telefone Bwana Nsengimana Claudien ku bijyanye n’ibyifuzo by’abaturage, adusobanurira ko Akarere gafite ingamba zo kwimurira ikimoteri cya Cyuve mu Murenge wa Gacaca, kuko ariho hateganijwe.

Aragira ati” “” Ikimoteri cya Cyuve kibangamiye ubuhinzi bukorerwa mu nkengero z’aho twagiteguye nk’uko abaturage babisobanura, ariko tumaze kubona ko cyamaze kwuzura turi mu myiteguro yo kuzacyimurira mu Murenge wa Gacaca, cyane ko twamaze no gutegura isambu tuzacyimuriramo. Ati nta mpamvu rero yo kukizitira Kandi tutazongera kugikoresha.””

Iki Kimoteri mu by’ukuri uretse no kubangamira umusaruro ukomoka ku buhinzi, ahubwo gifite n’izindi ngaruka ku buzima bwa muntu, bitewe n’umunuko ugisohokamo ukinjira mu ngo z’abagituriye, tutibagiwe ko no kurengera ibidukikije bidashobora kubahirizwa mu gihe kitabungabunzwe mu buryo bwuzuye.

Inkuru yateguwe na Theogene HABUMUREYI