Ibiciro byo kureba igikombe cy’Isi 2026 bishobora kubiza bamwe icyuya
Ibiciro byo kwinjira kureba imikino y’Igikombe cy’Isi bya 2026 byazamutse cyane ugereranyije n’ibyariho mu 2022, aho itike ihenze cyane izaba iri ku 6,370$ naho iyoroheje ikaba ku 100$.
Iri rushanwa riteganyijwe kubera muri Leta Zunze Ubumwe za Amerika, Mexique na Canada kuva tariki ya 11 Kamena kugeza ku ya 19 Nyakanga 2026, rikazahuza amakipe 48 azakina imikino 104.
Nk’uko byatangajwe n’Ishyirahamwe Mpuzamahanga ry’Umupira w’Amaguru (FIFA), amatike y’iyi mikino azaba agabanyije mu byiciro bine, kimwe n’uko byagenze mu 2022 ubwo Igikombe cy’Isi cyaberaga muri Qatar.
Ugereranyije n’irushanwa riheruka, ibiciro byiyongereye inshuro zirenze enye.
Mu 2022, itike yo kwinjira ku mukino ufungura yari hagati ya 55$ na 618$, ariko mu 2026 izaba iri hagati ya 560$ na 2,735$.
Ku mikino yo mu matsinda, aho ibiciro bisanzwe biba biri hasi, mu 2022 itike yari hagati ya 11$ na 220$, naho mu 2026 izaba iri hagati ya 100$ na 574$.
Umukino wa nyuma, ukunze kuba uhenze kurusha indi yose, nawo wiyongereye cyane — uvuye hagati ya 206$ na 1,607$ mu 2022, ugera hagati ya 2,030$ na 6,370$ mu 2026.
Ibi bituma Igikombe cy’Isi cya 2026 kiba kimwe mu marushanwa azaba afite amatike ahenze kurusha ayandi mu mateka y’iri rushanwa.
