Diplomasi nshya ya Trump yatanze umusaruro mu gukemura ibibazo bya RDC-Perezida Kagame
Perezida w’u Rwanda Paul Kagame avuga ko uburyo bwa dipolomasi ya Leta Zunze Ubumwe za Amerika bwatangiye kugaragaza umusaruro ushingiye ku mikorere ifatika aho gushingira ku mahame rusange ya demokarasi n’uburenganzira bwa muntu bidahita bihindura imibereho y’abaturage.
Mu kiganiro yagiranye na Steve Clemons, Perezida Kagame yatangaje ko uburyo bw’umuyobozi Donald Trump bwo gukora dipolomasi bushingiye ku nyungu zifatika ndetse ku kintu cyose kigomba kugira inyungu igaragara ku baturage “bufite amahirwe menshi yo kugera ku musaruro”.
Mu gihe politiki ya Amerika y’imyaka myinshi yagiye ikomatana ijwi ryo kwamamaza demokarasi n’uburenganzira bwa muntu, Kagame avuga ko Trump yazanye ikintu gishya: gushyira imbere ibyumvikana ku mpande zombi kandi bifatika mu mibereho y’abaturage.
Perezida Kagame yagize ati: “Ibyo ni ibintu ushobora kubara, ukabipima, ukabireba mu buzima bw’abantu, aho kureba gusa theories za demokarasi n’uburenganzira bwa muntu bitagira icyo bihindura igihe hari ibibazo bikomeye.”
Iyi mvugo irerekana ubushake bwo gushyira imbere ibyubaka amahoro n’umutekano mbere ya politiki zindi ziremereye zidakemura ibibazo by’aka kanya mu karere.
Perezida Kagame yashimangiye ko atarabona undi mukuru w’igihugu cya Amerika werekana ubushake, ingufu, igihe n’igitutu nk’icyo Donald Trump yagaragaje mu kibazo cya RDC n’u Rwanda.
Yavuze ko Trump yakoresheje uburyo bwimbitse bwo gukurikirana ikibazo, gutuma impande zihanganye zicara ku meza zimukiranuke, ari nabyo byagejeje ku isinywa ry’amasezerano y’agateganyo i Washington ku wa 4 Ukuboza.
Perezida Kagame yagize ati:“Nta na rimwe nabonye urwego nk’urwo rw’uruhare n’umurava muri Amerika mu bibazo bya Afurika, cyane cyane hagati ya Congo n’u Rwanda.”
Uyu murava wagaragaye mu gihe Ibibazo byo mu burasirazuba bwa RDC bimaze imyaka myinshi, bifite ingaruka ku mutekano w’u Rwanda, ku mibereho y’abaturage ndetse n’iterambere ry’akarere.
Iyi mvugo ya perezida Kagame ifite icyo ivuze mu rwego mpuzamahanga: Amerika ishobora kuba iri guhindura imikorere yayo muri Afurika.
Kubera ko uburyo bushingiye ku nyungu zifatika bushyira imbere iby’aka kanya, bwaba bufasha gukemura ibibazo by’impaka n’indi mitwe yitwaje intwaro.
Gushyira politiki ku ruhande bigaha umwanya imikorere ishingiye ku mibereho y’abaturage. Diplomasi ya Trump irashimwa mu bihugu bitari byinshi mubyemera.
Perezida Kagame ni umwe mu bakuru b’ibihugu bake bo muri Afurika bashima imikorere ya Trump mu buryo bweruye—cyane ko mu bihugu byinshi, Trump afatwa nk’utari umunyadipolomasi w’inararibonye.
Ibi bishobora gusiga icyuho mu mibanire ya Amerika n’ibihugu byibanda cyane ku mahame ya demokarasi, Ibiganiro bishingiye ku nyungu z’ubucuruzi n’umutekano bishobora kuzana impinduka mu mikoranire, ariko ntibihagije ku kubaka imiyoborere myiza mu gihe kirekire.
Gushaka igisubizo cyihuse kandi gifatika ku bibazo by’umutekano. Kuba Amerika ikoresha igitutu kigaragara mu kugarura umutekano. Gushyira imbere inyungu z’abaturage n’iterambere.
Kuba impamvu z’ingenzi zitera amakimbirane (ubutaka, imiyoborere, imitwe yitwaje intwaro) zidafatirwa umwanzuro w’ibanze. Kuba uburyo bwa Trump bushobora guhinduka bitewe n’uzamusimbura cyangwa politiki nshya.
Amagambo ya Perezida Paul Kagame agaragaza uko Afurika ibona politiki ya Amerika mu buryo bushya, aho iby’ukuri n’iby’aka kanya bigomba kuza imbere y’inyigisho ndende za politiki.
Nubwo uburyo bwa Trump bushobora kutemerwa na bose, Kagame avuga ko bwatanze umusaruro ugaragara mu gukemura ikibazo cyari cyarananiranye—ibintu atigeze abona mu myaka 30 ayoboye u Rwanda.
Gusa, igihe kizerekana niba ayo masezerano ya Washington ari intangiriro y’umutekano uhamye cyangwa ari indi ntambwe y’agateganyo mu rugendo rurerure rwo gushaka amahoro mu karere.
Inkuru ya MUKIZA Isaac
