Bagaragaje uburyob Isi ikomeje gushyira imbere intwaro kurusha ubuzima bw’abantu
Tom Fletcher, Under-Secretary-General for Humanitarian Affairs & Emergency Relief Coordinator, yahuye n’itangazamakuru mbere y’uko hatangazwa Global Humanitarian Overview (GHO) 2026, atanga ubutumwa bwimbitse bwigisha kandi bushengura umutima.
Yibukije amahanga ko Isi ikomeje gushyira imbere intwaro kurusha ubuzima bw’abantu, ibintu yise “ikosa riremereye rishobora gutuma abantu miliyoni bahura n’akaga gaherutse kubaho.”
Mu mwaka wa 2024, Isi yakoresheje amafaranga angana na $2.7 trillion mu kugura intwaro n’ibikoresho bya gisirikare. Nyamara muri 2026, OCHA ikeneye $23 billion gusa kugira ngo ifashe abantu miliyoni 87 bugarijwe n’inzara, intambara, ihindagurika ry’ibihe n’ibindi bibazo bibashyira mu kaga. Ayo mafaranga angana na 1% gusa y’ayo Isi ishora mu ntwaro. Fletcher yasobanuye ko ayo mafaranga make ashobora gukiza ubuzima bwinshi buruta abaguye mu ntambara ya kabiri y’Isi, ashimangira ko iyi mibare ari yo ivuga byinshi kurusha amagambo.
Fletcher yagaragaje ko Isi ifite ikibazo gikomeye kitagaragarira buri wese: ikinyuranyo gikabije hagati y’ayo ishyira mu bikorwa bya gisirikare n’ayo iyemerera ibikorwa by’ubutabazi. Uyu munsi, abantu miliyoni 87 bugarijwe n’inzara, ubukene, intambara, n’ibiza bitandukanye, bararwana no kubona ibiribwa, amazi meza, ubuvuzi n’ahantu ho guhungira. Abenshi muri bo ni abana bato, abagore n’abasaza bibera mu bihugu biri mu bibazo bikomeye harimo Yemen, Sudan, Gaza, Ukraine, Somalia, Ethiopia, DR Congo na Afghanistan.
Mu magambo akomeye yabashenguye imitima ya benshi, Fletcher yagize ati: “Iminsi 87 iri imbere izerekana niba isi ikiri iy’abantu, cyangwa niba ikomeje gushyira intwaro hejuru y’ubuzima bw’umwana.” Iyi minsi 87 yerekeza ku gihe gisigaye mbere yo gutangira ku mugaragaro GHO 2026, Fletcher asaba amahanga yose kwibaza niba koko icy’ingenzi kihutirwa ari intwaro cyangwa ubuzima bw’abantu.
Yasobanuye ko mu gihe amafaranga adahari, ingaruka zibangamira cyane imibereho y’abaturage: abana bapfa bazize indwara zoroshye nka malariya cyangwa isereri, imiryango igashirira mu nzara, abarwayi bakabura imiti n’ibikoresho by’ubuvuzi, impunzi zikabura aho zikinga ibiza n’ibisasu, naho ibiza bikabasiga mu icuraburindi. Fletcher yavuze ko iyo $23 billion itabonetse, atari imibare iba ibuze ahubwo ari ubuzima bw’abantu buba buri mu kaga ko kubura ubutabazi bw’ingenzi.
Nubwo ibihugu bikize byagiye bitanga inkunga buri mwaka, intambara n’ibiza bikomeje kwiyongera ku muvuduko uruta kure ubushobozi bw’amahanga bwo kubyitaho. Byongeyeho, ibihugu byinshi bifite ubukungu bwifashe nabi nabyo byagabanyije inkunga byatangaga. Icyuho kiri hagati y’amafaranga OCHA isaba n’ayo ibona cyaragutse ku buryo kidasanzwe mu myaka icumi ishize, bisaba Isi gutekereza neza ku ntera iri hagati y’igisirikare n’ubutabazi.
Fletcher yasabye Isi yose gukora impinduka zikomeye, zirimo kugabanya umutungo ujyana mu ntwaro zidafite uruhare mu kuzamura imibereho y’abantu, kongera ingengo y’imari igenerwa ibikorwa by’ubutabazi, no gushora imbaraga mu bikorwa byo kubaka amahoro no kurwanya impamvu z’intambara. Yavuze ko ishoramari mu mibereho y’abantu ari ryo rishingiye ku bumuntu bw’isi, ritandukanye n’ishoramari ry’intwaro rigenda ryongera uburibwe n’amarira.
Mu gusoza, Fletcher yibukije ko mu mwaka umwe Isi yashoye $2.7 trillion mu ntwaro, ariko mu mwaka utaha isabwa $23 billion kugira ngo ikize ubuzima bw’abatari munsi ya miliyoni 87. Yavuze ko icyo asaba Isi kitari ibitangaza, ahubwo ari 1% gusa y’ayo yita ko akomeje gutwika ubuzima mu ntambara. Yongeraho ko iminsi iri imbere izerekana niba Isi igifite umutima n’ubumuntu cyangwa niba yahisemo gukomeza gushyira imbere intwaro kurusha ubuzima bw’abantu.
Inkuru ya MUKIZA Isaac
