Abashakashatsi bagaragaje ibyago bikomeye by’urukingo rwa COVID-19
Abashakashatsi bo muri Stanford Medicine basohoye ubushakashatsi bushya busobanura impamvu urukingo rwa COVID-19 rwubatswe hakoreshejwe ikoranabuhanga rya mRNA rushobora, rimwe na rimwe, gutera myocarditis, ni ukuvuga kuzana umuze cyangwa kubyimba k’uruhu rw’umutima ku bantu bamwe na bamwe.
Myocarditis ni ikibazo cyo ku mutima gikunze kugaragara mu minsi 1 kugeza 3 nyuma yo guhabwa urukingo rwa mRNA, cyane cyane ku basore n’urubyiruko rw’abahungu bari munsi y’imyaka 30.
Abashakashatsi basanze hari proteyine ebyiri mu maraso (cytokines) CXCL10 na IFN-gamma zishobora gutera uburibwe bwo mu mubiri witegura kurwanya icyorezo nyuma yo guhabwa urukingo.
Umuyobozi w’itsinda ry’abashakashatsi, Dr. Joseph Wu, yasobanuye ko uru rukingo rufasha umubiri gutegura uburyo bwo kwirwanaho, ariko kuri bamwe bishobora gutuma habaho gucika intege k’umutima kuberako izo cytokines ziteza ububabare nubwo iyi ari ingaruka idakunze kubaho cyane.
Abahanga basanze amatembabuzi ya cytokines ashobora kuba intandaro yo kwinjira mu misokoro y’uturemangingo tw’umutima, bigatera uburibwe, gucika intege cyangwa ibimenyetso by’umutima.
Ariko kandi, mu bigereranyo, iyi ndwara iterwa n’urwo rukingo iboneka nk’ingaruka nkeya cyane, kuko ubushakashatsi bwerekana ko muri rusange ni mu bantu 140,000 babonye urukingo rwa mbere n’umwe gusa yagize myocarditis, kandi nyuma ya doze ya kabiri nabwo akaba umwe muri 32,000.
Abashakashatsi kandi basanze ko ingaruka zituruka ku kwandura COVID-19 ubwazo zigaragara kenshi kandi mu buryo bukomeye kurusha urukingo, aho umuntu ufashwe na COVID ashobora kugira imyuka y’umutima ndetse n’ibindi bibazo by’umutima mu buryo buhambaye.
Mu isesengura ryabo, abahanga bemeza ko no mu gihe hari ibyago byo kugira myocarditis, abenshi barakira vuba kandi nta ngaruka ndende bagira ku mutima. Ikindi kandi, abashakashatsi barimo no kugerageza uko bakoresha ibintu bimwe na bimwe bifasha mu kugabanya ubwo buribwe, harimo n’ibintu biva mu mafunguro bishobora kugira uruhare mu kugabanya uburibwe bw’umutima.
Dr. Wu yongeraho ko urukingo rwa mRNA rukomeje kuba urufunguzo mu kurwanya icyorezo cya COVID-19, kuko rutuma abantu barushaho kubona ubwirinzi ku buryo bwagutse kandi bugabanya ibyago byo kwandura no guhitanwa na COVID-19, nubwo hamaze kugaragara izi ngaruka nke kuri bamwe.
Urukingo wa Covid-19 rushobora gutera indwara y’umutima kubera ikoranabuhanga rya mRNA rwakoranywe ariko ntabwo izo ngaruka ari mbi cyane kurusha ingaruka z’icyorezo ubwacyo.
