Perezida wa Kiyovu Sports yihenuye ku ikipe yifuzaga Serumogo Ally

Kuri uyu wa gatandatu tariki 25 Kamena 2022, ikipe ya Kiyovu Sports yatangaje ko yongereye amasezerano myugariro wayo Serumogo Ally Omar, ukina inyuma ku ruhande rw’iburyo.

Uyu musore byavugwaga ko yifuzwa n’amakipe atandukanye arimo Rayon Sports, nyuma yo kwitwara neza muri shampiyona ya 2021-2022.

Kiyovu Sports yakoze akazi keza cyane imusinyisha amasezerano mashya y’imyaka ibiri nubwo byavugwaga ko yamaze kumvikana na Rayon Sports.



Nyuma yo kongerera amasezerano uyu myugariro, Perezida wa Kiyovu Sports Mvukiyehe Juvenal, abinyujije ku mbuga nkoranyambaga ze yagize icyo abwira abamwifuzaga, avuga ko bamubabaje.

Yagize ati “Harya ngo murashaka Serumogo, umukinnyi? Murambabaje.”

Serumogo Ally umaze imyaka ine akinira Kiyovu Sports, dore ko yayigezemo mu 2018, muri shampiyona irangiye ya 2021-2022 mu mukino w’umunsi wa 28 yashimiwe na Kiyovu Sports mu mukino banganyije na Etoile del’Est 1-1, nyuma yuko yari yujuje imikino 110 ayikinira.

Serumogo ari ku rwego rwo hejuru kuko n’umutoza w’Amavubi yamugiriye icyizere amubanza mu kibuga mu mikino 2 aheruka gukina mu gushaka itike ya AFCON 2023 yakinnye na Mozambike na Senegal.

Comments

comments