Isomwa ry’urubanza rwa Col Tom Byabagamba na Frank Rusagara ryongeye gusubikwa bwa gatatu

Kuri uyu wa Gatanu taliki ya 13 Ukuboza 2019, nibwo hari hateganyijwe ko harasomwa umwanzuro w’ubujurire bw’urubanza ruregwamo Col Tom Byabagamba na Frank Rusagara wari birangira iri somwa risubitswe ku nshuro ya gatatu.

Mu 2016, urukiko rukuru rwa gisirikare rwakatiye Col Byabagamba gufungwa imyaka 21 naho Frank Rusagara akatirwa gufungwa imyaka 20. Bajuririye uyu mwanzuro mu rw’ubujurire.

Uru rubanza mu rukiko rw’ubujurire rwatangiye kuburanishwa mu kwezi kwa gatanu uyu mwaka.

Mu kwezi kwa cyenda rwarapfundikiwe bavuga ko umwanzuro uzasomwa tariki 15/11/2019, kuri iyi tariki ntirwasomwe rwimuriwe tariki 29/11/2019, uwo munsi nabwo ntirwasomwa rwimurirwa 13/12/2019.

Kuri uyu wa gatanu ubwo hari hategerejwe isomwa ry’umwanzuro w’uru rubanza,ryasubitswe ku nshuro ya gatatu.

Col Tom Byabagamba wahoze akuriye abarinda Perezida Paul Kagame w’u Rwanda na Frank Rusagara, wahoze mu ngabo ku ipeti rya Brigadier General, bafunze kuva mu 2014.

Bashinjwa “guteza imvururu muri rubanda” no “gukwiza ibihuha bangisha abaturage ubutegetsi”, kuri Col Byabagamba hakiyongeraho “guhisha ibimenyetso” no “gusuzugura ibendera ry’igihugu”.

Col Byabagamba na Rusagara kuva bafatwa bombi bakomeje guhakana ibyaha baregwa.

Mu bwanditsi bw’urukiko rw’ubujurire i Kigali batangaje ko isomwa ry’umwanzuro ryasubitswe kuko urubanza rutararangira kwandikwa.

Bavuze ko umwanzuro kuri uru rubanza wimuriwe tariki 27 Ukuboza 2019..