Igihano cya Rusesabagina cyakomeje gushimangirwa,Sankara yoroherezwa ibihano

Urukiko rw’Ubujurire mu Rwanda rwanzuye ko Paul Rusesabagina n’abareganwa nawe bahamwa n’ibyaha birimo iterabwoba rugumishaho imyaka 25 y’igifungo kuri we.

Muri Nzeri (9) 2021 Rusesabagina na Callixte Nsabimana ‘Sankara’ bakatiwe gufungwa imyaka 25 undi 20 bahamijwe ibyaha byo kuba mu mutwe w’iterabwoba no gukora iterabwoba.

Uru rukiko uyu munsi rwanzuye ko ‘Sankara’ agabanyirizwa igihano agafungwa imyaka 15 kuko yemeye ibyaha yarezwe akanafasha iburanisha.

Naho Herman Nsengimana nawe wabaye umuvugizi w’umutwe wa FLN uru rukiko rwavuze ko yari yagabanyirijwe ibihano cyane, rurabizamura kuva ku myaka 5 ijya kuri 7.

Abandi bantu 18 bareganwa n’aba batatu uru rukiko rwagumishijeho ibihano bari bahawe n’urukiko rukuru.

Ubushinjacyaha bwari bwajuriye busaba ko aba baregwa bongererwa ibihano, ndetse busabira Rusesabagina gufungwa burundu.

Naho abaregwa bari bajuriye basaba kugabanyirizwa ibihano, mu gihe abaregera indishyi bo bari basabye ko zongerwa kuko bagenewe nkeya.

Rusesabagina, ufatwa nk’ukuriye abandi muri uru rubanza, yivanye mu iburanisha rigitangira mu kwezi kwa gatatu 2021 avuga ko “nta butabera niteze” mu nkiko zo mu Rwanda.

Callixte Mbarushimana “Sankara” (i bumoso) yakatiwe 15, Rusesabagina (i buryo) akatirwa 25

Comments

comments